Atividade

CI-UNDP Entrega Sertifikadu ba Formadu TJK Faze II

CI-UNDP Entrega Sertifikadu ba Formadu TJK Faze II

Dili – Conselho de Imprensa de Timor-Leste (CI) no Programa Nasoens Unidas ba Dezenvolvimentu (PNUD/UNDP) entrega sertifikadu ba formadu Treinamentu Jornalizmu Komprensivu (TJK) faze II hamutuk na’in 23.

Treinamentu Jornalizmu Komprensivu faze II partisipa hosi jornalista órgaun no meiu komunikasaun sosiál sira, reprezentante rádiu komunidade, estudante Komunikasaun Sosiál UNTL no UNITAL, inklui mós ofisiál mídia STAE.

“Ami hahú primeiru grupu iha tinan kotuk, agora segundu grupu ninian no ami hahú tan ona terseiru grupu katak Conselho de Imprensa durante tinan tolu ninia responsabilidade kona-ba hasa’e kapasidade ne’e ami hala’o,” hatete Prezidente CI iha serimónia graduasaun Treinamentu Jornalizmu Komprensivu faze II, Kinta-Feira, 17/01, iha Salaun Suai Room, Timor-Plaza Díli.

Prezidente CI dehan oras ne’e dadaun CI no UNDP iha ona formatu formasaun ida progresivu tanba kombina buat hotu, la’ós de’it iha kláse laran maibé mós ba iha kampu hodi entrevista nune’e mós ba iha televizaun atu prátika televizivu.

Iha biban ne’e, Prezidente CI husu ba formadu TJK atu kontinua aprende no tau iha prátika iha serbisu loron-loron iha mundu jornalizmu nune’e buat ne’ebé aprende labele lakon leet de’it iha loron ida.

Prezidente CI mós hato’o agradese wa’in ba UNDP ne’ebé bele ajuda ona Conselho de Imprensa durante tinan rua liu-liu iha situasaun polítika Timor nian ne’ebé ladun di’ak.
Lori Conselho Imprensa nia naran, Prezidente CI hato’o mós agradese wa’in ba Povu Japaun ne’ebé kontinua fó apoiu ba Timor-Leste, liu-liu Mídia sira iha Timor. 

Entretantu Embaixadór Japaun ba Timor-Leste, Hiroshi Minami hatete liuhosi formasaun ne’e, formadu sira bele iha koñesimentu hodi halo reportajen ida ho étika no profesionál hodi deteta saída mak loos no saída mak sala.

Hirashi Manami hato’o parabens ba partisipantes Treinamentu Jornalizmu Komprensivu. Nia espera katak formadu sira bele susesu liutan iha futuru.

Reprezentante partisipantes Treinamentu Jornalizmu Komprensivu, Isabel Freitas sente kontente ho formasaun refere tanba bele eleva sira nia koñesimu iha mundu jornalizmu ninian.

“Ami serbisu tinan naruk iha koñesementu iha parte rádiu nian. Hanesan feto, ha’u mós orgullu hodi tuir formasaun refere nune’e ha’u mós ble serbisu iha televizaun, jornal, online,” dehan Isabel. 

Formadu sira mós husu ba CI no UNDP atu iha futuru kontinua fó formasaun jornalizmu ida avansadu ba sira.