Atividade

Identifika Kapasidade no Rekursu Organizasaun Mídia No Hamosu Estratéjia Foun

Dili, Conselho de Imprensa de Timor-Leste (CI) no UNDP Timor-Leste, realiza workshop loron ida sobre “Identifika Kapasidade no Rekursu Organizasaun Mídia” iha salaun Konferénsia Hotel Ramelau, Kinta (6/12/2018), ho oradór internasionál hosi Australia, Bob Howarth.

Communication Analysis UNDP Timor-Leste, Yuichi Ishida, esplika workshop ne’e atu mídia sira identifika sira nia problema no hamosu estrategia foun, “atu jornalista no mídia sira identifika problema polítika no ekonomia, liu hosi analysis SWOT (Strength, Weakness, Opportunity and Treat), sira bele hatene  forsa, frakeza, oportunidade no ameasa ne’ebé sira iha no hasoru atu bele hamosu estratéjia foun,” esplika communication analysis UNDP Timor-Leste.

Yuichi Ihida afirma katak, atividade ne’e atu partisipantes sira bele aprende kona-ba gestaun no advertisement ne’ebé apresenta hosi orador internasionál Bob Howarth, “ikus liu Maun Bob esplika management no hadi’a servisu advertisement, atu sira bele la’o ba oin no la presiza apoiu hosi organizasaun estranjeiru, “ esplika Yuichi.

Iha oportunidade ne’e, Koordenador Publisidade Jornál Timor Post, Josefina Guterres, hatete bele aplika esperensia ne’ebé nia hetan hodi hadia sira nia rendimentu, “ami sei halo pendekatan ba iha marketing, ami sei halo lobby ba iha Governu, NGO no ema ne’ebé halo negósiu hanesan perusahaan atu nune’e iha futuru ami bele hetan income barak liu.”

Workshop loron ida partisipa hosi marketing mídia, Estudante, mídia officer, no jornalista hosi mídia eletróniku, imprime no online ho total ema 46 kompostu hosi mane 29 no feto 17.