CI Hala’o Vizita Traballu ba Jakarta

Jakarta – Conselho de Imprensa de Timor-Leste (CI), foin lalais ne’e, reprezenta hosi Konselleiru, Paulo Adriano da Cruz Araujo no Diretora Ezekutiva, Ana Teresa Sequeira, hala’o vizita traballu ba Jakarta Indonézia durante loron lima (5), iha loron 21to’o 26 Outubru.

Iha vizita traballu ne’e, delegasaun CI partisipa iha Asian Mediation Asosiation Conference ba dala lima (5) iha Jakarta. Konferénsia ne’e akontese dala ida kada tinan haat no Indonézia maka sai uma na’in ba konferénsia dadaun ne’

Diretora Ezekutiva CI, Ana Teresa Sequeira, hatete Conselho de Imprensa hetan konvite hodi ba partisipa iha konferénsia refere tanba CI sai ona membru mediador iha PMN (Pusat Mediasi Nasional)

“Ita hetan konvite tanba ita hetan ona formasaun hosi Pusat Mediasi Nasional Indonesia, no ita sai ona hanesan membru mediadór hosi PMN,” dehan Diretora CI, Ana Teresa Sequeira

Aproveita vizita traballu ne’e, Konselleiru Paulo Adriano no Diretora Ana Teresa, hala’o mós enkontru ho instituisaun rua hanesan Dewan Pers Indonesia (DPI) no Lembaga Pers Dr. Soetomo (LPDS), partisipa iha lansamentu livru “Pers Ideal Untuk Masa Demokrasi” (Pers Ideal Iha Era Demokrasia) ne’ebé hakerek hosi Atmakusumah (Skritor livru “Pers Ideal Iha Era Demokrasia”)

Iha enkontru ho DPI no LPDS, hodi diskuti kona-ba revizaun akordu serbisu hamutuk entre  Conselho Imprensa ho Dewan Pers Indonesia no diskuti mós kona-ba posibilidade kooperasaun entre Conselho Imprensa ho Lembaga Pers Dr. Soetomo (LPDS).

Diretora esplika, iha tinan 2016, CI asina ona nota entendimentu ida ho DPI ba programa tinan lima (5).

DE dehan aproveita vizita traballu refere, CI hahú halo diskusaun ida tan ho DPI atu bele halo revizaun ba akordu refere hodi haruka funsionáriu balun CI nian hodi ba estájiu iha DPI kona-ba karteira profisionál ninian.

“Ita nia staff sira ne’ebé maka serbisu ba iha área ida ne’e (Estajiu Karteira Profisional), sira mós ba halo estájiu atu bele hare direita nune’e bainhira atu sertifika ita nia jornalista sira, sira mós iha ona esperiensi,” esplika DE. (CI)


Imprimir   Email