Conselho de Imprensa fó Benvidu ba Jornál Diáriu Dili Post

Díli – Conselho de Imprensa de Timor-Leste (CI), hato’o benvindu no parabens ba Jornál Diáriu Dili Post ne’ebé ofisialmente ohin (16/11), hala’o ona lansamentu ezistensia hanesan meiu komunikasaun ida iha Timor-Leste.

Prezidente Interinu CI, iha nia intervensaun, iha serimónia lansamentu, hatete mídia nia papél importante tebtebes ba dezenvolvimentu Timor-Leste ninian.

“Benvindu ba Díli Post. Mídia ne’e importane tebtebes ba era dezenvolvimentu ida ne’e tanba mídia hanesan instrumentu ida liga kamada sosiál hosi kiik to’o boot no hosi boot to’o kraik,” dehan Prezidente Interinu CI, Konselleiru José Maria Ximenes, iha nia diskursu iha serimónia abertura lansamentu Jornál Diáriu Dili Post, Sesta-Feira (16/11), iha Becora, Díl.

Iha biban ne’e, Diretór nomós na’in ba Jornál Diáriu Dili Post, Fernando da Silva, husu ba Conselho de Imprensa atu kontinua tau matan ba Diáriu Dili Post karik komete eru ruma, nune’e sira bele hadi’a-án nafatin.

“Conselho de Imprensa, ami sala karik, iha instituisaun ka seitór pivadu ruma, ema pesoal ida la satisfas ho ami nia notísia, favor ida bele ajuda ami atu ami bele hadi’a-án,” dehan Fernando.

Diretór ne’e kompromete katak sira sei hato’o informasaun ida independente, no jornalista sira sei la inklina ba partidu ida ka grupu ida tanba jornalista ne’e ema hotu nia ibun no tilun.

Diáriu Dili Post sei halo Cek and reecek ba notísia hotu molok hatun, sei hatun notísia sira hotu ho balansu no kredivel. (CI)


Imprimir   Email