Díli, 23/08/2017 - Conselho de Imprensa de Timor-Leste (CI) ba dahuluk hala’o sosializasaun kona-ba Lei Komunikasaun Sosiál (Komsos) no regulamentu sira Conselho de Imprensa nian ba mídia na’in no jornalista sira iha kapitál Díli.
Iha abertura sosializasaun ne’ebé halao iha salaun enkontro Ministerio Obras Publikas, Transportes no Telekomunicações, Díli, Quarta – feira, 23/08/2017, Prezidente CI, Virgílio da Silva Guterres, hatete sosializsaun sai hanesan matadalan ida atu informa ba mídia na’in no jornalista sira bele komprende regulamentu sira CI nian inklui lei Komsos.
“Faze ohin (23/08) hanesan sosializasaun katak, atu informa ba aspeitu tékniku, implementasaun sira no mekanizmu kona-ba regulamentu sira Conselho de Imprensa nian,” Prezidente CI dehan. Nia esplika CI sei halo sosializasaun haleu munisípiu sira hotu inklui regiaun espesial Oecussi, hodi introdus lei Komsos no regulamentu sira CI nian, nune’e públiku bele hatene serbisu jornalista nian inklui papél CI ba promove liberdade Imprensa no liberdade espresaun iha Timor-Leste.
Durante sosializasaun, CI mós simu sujestaun no krítika barak hosi mídia na’in no jornalista sira nune’e bele hadi’a di’ak liutan serbisu CI nian iha futuru. Jornalísta sira kestiona kona-ba inkompatibilidade jornalista sira ne’ebé serbisu hanesan jornalista maibé pozisaun hanesan funsionáriu públiku.
Sujestaun seluk mós husu atu CI bele toma konsiderasaun ba Jornalista sira ne’ebé serbisu iha mídia dutrinadu naun lukrutivu hanesan rádiu sira universitáriu nian inklui mídia partidu polítiku nian atu bele hetan mós karteira professional. Iha sorin seluk, Provedor dos Direitus Humanus no Justísa (PDHJ), husu atu hadi’a fali regulamentu balun CI nian ne’ebé konsidera jornalísta hanesan arguido.
Tuir PDHJ katak só tribunal de’it maka bele kondena ema ida hanesan arguidu ka lae. Hatan ba ne’e, Prezidente CI, Virgílio da Silva hatete, sei tur hamutuk ho komisaun funsaun publika atu hare ba statutu funsionario publiku hirak ne’ebé servisu iha RTTL,EP. Alem de ne’e CI mos sei diskuti ba rekomendasaun sira seluk ne’ebé partisipantes sira hato’o.
Regulamentu sira Conselho de Imprensa nian maka hanesan kódigu étika jornalístika, prosedimentu ba ezersisiu direitu hatan no ratifikasaun, karteira professional jornalístika nian, prosedimentu dixiplinar hasoru jornalista no publikasaun sira, regra ba aplika ezame final estájiu no identifikasaun ejaminadór, rejistu orgaun no meius komunikasaun sosiál sira, prosedimentu mediasaun.
“Regulamentu sira ne’e CI aprova hafoin halo konsulta liuhosi enkontru nomós liu hosi kontaktu maluk meius komunikasaun sira seluk nune’e CI aprova no ikus liu públika iha jornál sa repúblika,” Virgílio esplika.