Conselho de Imprensa de Timor-Leste (CI) ho Sekretáriu Estadu Fortalesimentu Institusionál (SEFI), realiza workshop loron sorin ho tema “Polítika no Estratéjia Implementasaun ba Fortalesimentu Institusionál iha Âmbitu Reforma Administrasaun Públika”, ba mídia sira.
Objetivu hosi Workshop ne’e maka atu atualiza informasaun kona-ba polítika, estratéjia no planu fortalesimentu institusionál iha âmbitu reforma administrasaun públika, diskusaun kona-ba kontribuisaun mídia nian ba asegura ukun di’ak “Boa Governasaun” no planu serbisu hamutuk iha futuru ba inisiativa fortalesimentu institusionál no transformasaun seitór públiku.
Sorumutu loron sorin ne’e realiza iha Hotel JL Vila, Fatuhada, Díli, Tersa-Feira, 30/05/2017, serbisu hamutuk entre Conselho de Imprensa no Sekretáriu Estadu Fortalesimentu Institusionál.
Prezidente CI, Virgílio da Silva Guterres, iha diskursu abertura hatete rezultadu diagnóstika importante tebes ba mídia sira nune’e jornalísta sira bele transforma dadus estatístika ba data jornalistiku hodi públiku bele kompriende.
“Husu ba maluk mídia sira atu oinsá transforma dadus sira ne’ebé hetan hosi levantamentu sira ne’ebé halo hosi SEFI, atu fasilita liu ita nia leitores sira atu komprende,” Prezidente CI hato’o kestaun ne’e iha Hotel JL Vila, Segunda, 30/05/2017.
Prezidente CI esplika workshop refere hanesan grasa ida ba mídia sira tanba iha mundu jornalízmu bain-bain jornalísta sira maka tenke buka hetan dadus kona-ba frakeza hotu instituisaun ida nian maibé iha instituisaun ida hanesan SEFI buka hatene uluk ona frakeza hirak ne’e ba mídia sira.
Virgílio salienta, CI iha komitmentu boot atu koopera ho instituisaun estadu no privadu sira hotuhotu atu bele tulun públiku sira nia direitu hodi hetan informasaun ida lolos liuhosi públikasaun sira iha mídia.
Iha fatin hanesan, Ministru Estadu, koordenadór asuntu Administrasaun no Justísa, Minístru Administrasaun Estatal, Dionisio Babo, hatete papel SEFI liuhosi rezultadu diagnóstika nasionál refere sei tulun Estadu atu transforma seitór públiku iha reforma administrasaun ninian.
“Diagnóstiku ida ne’ebé deskobre katak ita nia isntituisaun estadu sira nian ne’e seidauk to’o nível ida as liu entermus de atetudi, servi públiku (Pelayanan Masyarakat),” Dionisio esplika.
Nia hatutan buat barak maka sei fraku iha instituisaun estadu sira hodi fó afeta ba serbisu administrasaun públika nune’e hamosu mal jestaun no mal administrasaun buras tebes.
Konta ho mídia nia kontribuisaun atu hadi’a seitór administrasaun públika iha Timor-Leste maka SEFI serbisu hamutuk ho CI atu fasilita informasaun sira importante ba mídia sira atu bele hato’o ba públiku. (CI)