Prezidente Conselho de Imprensa de Timor-Leste (CI), Virgílio da Silva Guterres hato’o apresiasaun ba medidas ne’ebé Dr. Rui Maria de Araujo foti hodi haruka karta ba Tribunál husu atu labele fó sentensa no multa ba jornalísta no eis diretór Jornál Timor Post.
“Conselho de Imprensa hakarak fó apresiasaun tebes ba medidas ka desizaun ne’ebé Dr. Rui foti. Ida ne’e refleta katak Dr. Rui laiha intensaun atu hatama jornalista ba prizaun, maibé iha intensaun pedagójiku katak hakarak loke oportunidade atu fó hanoin ba jornalísta sira atu tau atensaun iha aprezentasaun faktus,” Prezidente CI, Virgílio Guterres hato’o kestaun ne’e iha entrevista ho Ajensia Tatoli, iha RTTL, kuarta, 31/05/2017.
Depois de Dr. Rui hato’o kart aba Tribunal, Tuir Prezidente CI katak depende ba juiz sira atu konsidera kalae karta ne’ebé Dr. Rui haruka ona ba Tribunál.
Iha parte seluk, Prezidente CI dehan depende ba Timor Post no jornalísta Oky atu hare surat ne’ebé Dr. Rui haruka ba Tribunal ,atu karik iha obrigasaun ruma ne’ebé sira atu halo maka sira presiza halo apresiasaun ba Dr. Rui nia karta.
Conselho de Imprensa hein katak tribunal deside tuir saída maka Lezadu (Dr. Rui) nia pedidu hodi fó de’it sansaun pedagójiku ou sansaun edukativo balun, maibé labele lori jornalísta ba kadeia. (CI)