Minístru dos Negósius Estranjeirus no Koperasaun (MNEK), Hernanio Coelho hatete Liberdade Imprensa no Liberdade Espersaun Timor-Leste (TL) nian di’ak liu iha nasaun sira iha ázia no Áfrika.
Hernanio Coelho hato’o kestaun ne’e bainhira enkontru ho Prezidente Conselho de Imprensa (CI), Virgílio da Silva Guterres, Tersa-Feira, 19/04/2017, iha MNEK, Praia dos Coqueirus, Díli.
Minístu ne’e esplika nasaun barak iha Ázea, sira nia mídia la livre atu asesu ba kobertura ba líder polítiku sira maibé iha Timor-Leste jornalísta bele halo kobertura no asesu livre ba buka hatene informasaun saída de’it maka la’o iha nasaun ne’e.
Hernanio esplika papél CI nia importante tebes ba nasaun Timor-Leste ne’ebé oras ne’e dadaun la’o hela iha prosesu dezenvolve nasaun iha seitores oi-oin.
Nia dehan Timor-Leste tama ona iha era mídia dijitál ne’ebé avansadu lori vantajen no dezvantajen ba ita, tanba ne’e TL presiza lei Informasaun Teknolojia (IT) atu bele regula sidadaun sira.
MNEK mós sujere atu TL kontinua hametin eventu Media Familly ne’ebé tinan hirak ba kotuk estabelese ona.
Media Familly hanesan eventu ida ne’ebé TL konvida jornalísta nasaun Ázia sira mai halo kobertura iha Timor-Leste kona-ba área oioin hodi hatudu ba nasaun seluk iha Ázia no mundu.
Nia dehan mídia sira iha Timor-Leste nia papél importante tebes atu suporta polítika estadu nian kona-ba Adezaun TL ba Ázean. Tanba mídia sira iha rai liu públika beibeik kona-ba Timor katak seidauk prontu atu hola parte iha Ázean.
Entretantu sorumutu entre MNEK ho CI ne’e hodi ko’alia kona-ba planu semináriu internasionál durante loron rua ne’ebé CI sei hala’o hahú loron 09 to’o loron 10 fulan Maiu tinan ne’e, hodi selebra primeira aniversáriu CI iha loron 10 fulan Maiu.