Conselho de Imprensa Timor-Leste (CI-TL) hamutuk ho Comisaun Nasionál Eleisaun (CNE), Kuarta-feira,(08/03), realiza semináriu konjunta ho tema “Kobertura Eleisaun” iha salaun CNE, Colmera, Díli, ba jornalísta husi mídia imprimi, rádiu, televizaun no online, ho objetivu fahe informasaun kona-ba lala’ok kobertura iha eleisaun hodi garante independensia, imparsialidade, balansu ba informasaun durante eleisaun prezidensiál no parlamentár.
Prezidente Conselho Imprensa Timor-Leste, Virgílio da Silva Guterres iha diskursu abertura semináriu konjunta ne’e hatete, iha tempu kampaña, jornalísta tenke hakruk ba kódigu konduta no jornalísta labele sai fali notísia.
“Kandidatu no partidu hotu sei uza rekursu ne’ebé sira iha, iha tempu kampaña atu povu vota ba sira. Iha situasaun hanesan ne’e, mídia tenke hakruk ba kódigu konduta ne’ebé iha, Jornalísta sira labele sai fali notísia, kartaun ne’ebé mídia sira iha, la’os atu viola situasaun sira kobertura nian. Mídia mós labele uza atributu kandidatu ka partidu nian bainhira hala’o kobertura.”
“Nune’e molok halo kobertura presiza koordena malu atu labele uza transporte kandidatu ka partidu iha hala’o kobertura. Editór no xefe editór sira katak to’o ona tempu atu uza lia fuan no imajen labele hamosu interpretasaun lori ba tendénsia intoleránsia, no ba situasaun hotu kobertura eleisaun nian katak konfirmasaun tenke halo ba ajénsia hotu inklui STAE no CNE,” dehan Prezidente CI Virgílio da Silva Guterres.
Iha biban ne’e, Prezidente CI husu mídia sira labele halo interpretasaun no predisaun mesak durante fáze eleisaun, mídia tenke fó sai rezultadu loloos, tanba ne’e mídia tenke krítiku tebes no iha divulgasaun informasaun tenke garantia faktu ne’ebé loos atu ema la uja ba halo intrepretasaun hodi hamosu konflitus.
Prezidente Virgílio dehan mídia tenke honestedade no nakonu ho konsensia hanesan Jornalísta iha halo tratamentu ne’ebé justu ba kandidatu sira e husu mós ba autoridade seguransa atu fó mós tratamentu ne’ebé hanesan ba mídia.
Iha fatin hanesan Prezidente CNE, Alcino Barris hatete iha períodu eleisaun, papél mídia importante, maske nune’e presiza tau atensaun tanba iha tentasaun ba interese bainhira fó sala notísia bele hamosu tendénsia.
“Iha momentu fahe informasaun, CNE nia dezeja mídia sira tenke garante notísia ne’ebé la inklina,” Portavos CNE, Alcino Barris hatete.
Iha aprezentasaun, Provedor Interino atuál Adjuntu PDHJ ba área Direitu Humanus, Horacio de Almeida hatete Konstituisaun RDTL no Konvensaun ne’ebé Timor - Leste ratifika garantia direitu sidadaun sira nian atu partisipa iha eleisaun, signifika katak oinsá sidadaun sira uja sira nia direitu ho livre atu eskolia iha vota, livre hetan informasaun, kestaun mak oinsá hotu hotu uza direitu ida ne’e ho responsabilidade.
Importansia hosi kobertura iha eleisaun prezidensiál ho parlamentár maka CI-TL no CNE liu hosi estebelese nota entendimentu hodi hari’i mídia senter nune’e bele fasilita serbisu jornalista husi mídia nasionál no internasionál sira. (*)