Delegasaun CI foto hamutuk ho membru Media Entertainment and Art Alliance

MEAA-IFJ Sei Oferese Bolsu Estudu

SYDNEY -  Media Entertainment and Art Alliance (MEAA) no International Federation of Journalist (IFJ) Asia Pacific sei fo apoiu ba dezenvolvimentu midia liu husi kapasitasaun ba rekursu umanu liliu ba jornalista sira hodi oferese bolsu estudu. 

Kompromisu ne’e hato’o liu husi Executive Director MEAA, Paul Murphy no Jane Worthington husi IFJ iha sorumutu ho delegasaun CI,  iha sede MEAA, Sydney Australia iha loron 16 Novembru 2016.  

MEAA ho IFJ loke oportunidade kolabora ho CI atu bele ajuda fo treinamentu reportajen investigativu ba jornalista Timor-oan sira no fo apoiu kapasitasaun rekursu humanus iha area jornalismu,” hateten CEO Paul Murphy.

Delegasaun CI mos loke komunikasoens entre reprezentante Asosiasaun Jornalista Timor-Leste (AJTL) iha CI, Hugo Fernandes ho IFJ no mos hametin komunikasaun entre reprezentante Timor Leste Press Union (TLPU) iha CI, Francisco Belo Simôes da Costa, atual Prezidenti TLPU. 

Alende ne’e, MEAA no IFJ fo hanoin atu  asosiasaun mídia sira ezerse sira nia funsaun atu fo advokasia konkreta ba nia membru sira ne’ebe infrenta justisa no hetan violasaun fizika. IFJ konsidera kualker aktu violensia ne’ebe kontra servisu jornalista iha públiku nudar meius ou tentativa direta atu ‘hamate’ liberdade imprensa. 

Kabe ba situasaun Timor-Leste nian, AJTL ho TLPU iha kompromisu fo advokasia ba violensia sira ne’ebe maka autoridade siguransa sira halo ba jornalista sira. Husi kazu konkretu rua maka hanesan individu Polisia Nasional Timor-Leste (PNTL) husi unidade Tranzitu baku jornalista Business Timor, Geronimo Amaral da Silva, ne’ebe akontese iha 25 Julhu 2016, inklui kazu jornalista TAFARA Online ne’ebe hetan violensia husi membru PNTL ho FALINTIL-Força Defesa de Timor-Leste (F-FDTL) iha Suai-Covalima.

“Maioria kazu violensia hasoru profisaun jornalista involve husi autoridadi sira seguransa nian. Tanba aktu ne’e kategoria krimi maka AJTL ho TLPU fo advokasia hodi lori ba Ministeriu Púbiku hodi prosesa tuir Lei. TLPU ho AJTL mos hasai deklarasaun liu hosi konferensia imprensa kondena aktu sira ne’e no husu atu autoridade sira tenki respeita knar jornalista sira nian ne’ebe garante iha Konstituisaun RDTL artigu 41-42 kona-ba liberdade espresaun no imprensa,” esplika Hugo Fernandes.

Prezidente CI, Virgilho Guterres reafirma katak CI iha ona planu atu halo akordu ida ho Komando F-FDTL no PNTL para intende malu iha ida-idak nia servisu ba interese nasional hodi bele minimiza dezintendimentu entre PNTL no F-FDTL ba servisu professional jornalista sira nian.** CI **


Imprimir   Email