Conselho de Imprensa no Embaixada Australia iha Timor-Leste, Diskute Hamutuk kona-ba Dezenvolvimentu Mídia iha Timor-Leste

Atu dezenvolve di’ak liután liberdade Imprensa no liberdade espresaun iha Timor-Leste, papél mídia nian importante tebes atu promove no hametin asuntu ne’e iha país ida independente no demokrátiku hanesan Timor-Leste.

Relasiona ho asuntu ne’e, maka iha loron 24 Abril 2018, Conselho de Imprensa de Timor-Leste (CI-TL) hamutuk ho Embaixada Austrália iha Timor-Leste, diskute hamutuk prosesu dezenvolvimentu mídia iha Timor-Leste dadauk ne’e no iha futuru.

Durante diskusaun, Prezidente CI-TL esplika kona-ba progresu no dezafiu sira ne’ebé mídia hotu-hotu enfrenta durante Timor-Leste nia independénsia tinan 16 nia laran nomós esplika independénsia meus komunikasaun sira nian iha ambiente polítika eleisaun antisipada dadauk ne’e iha rai laran.

“Iha kanál mídia balu ne’ebé ami nota katak iha tendensia parsiál ba partidu polítika balu iha sira nia publikasaun durante períodu polítika eleisaun antesipada,” hatete Prezidente CI, Virgílio da Silva Guterres.

Nia reforsa katak CI-TL hola mós papél ida importante, oinsá atu tau matan no tulun órgaun no meius komunikasaun sosiál sira iha TL hodi bele dezenvolve di’ak liutan nune’e bele kontribui ba hametin demokrasia iha Timor-Leste.

Durante diskusaun, Conselho de Imprensa no Embaixada Austrália iha Timor-Leste iha komitmentu boot katak ba futuru iha posibilidade atu estabelese kooperasaun entre CI-TL ho Embaixada Austrália hodi dezenvolve mídia iha Timor-Leste.

Iha enkontru ne’ebé realiza iha salaun plenária CI-TL, Quintal-Boot, Díli, marka prezensa hosi Prezidente Conselho de Imprensa, Virgílio da Silva Guterres, Diretora Ezekutiva, Ana Teresa Sequeira, Diretór Diresaun Análize Mídia, Alberico Junior, no mós reprezentante Relasaun Públika Embaixada Austrália nian hamutuk na’in tolu.

Komunikasaun Sosiál nú. 5/2014, loron 19, fulan Novembru, nu’udar lei dahuluk Timor-Leste hodi garante no promove liberdade imprensa no liberdade espresaun ne’ebé konsagra ona iha Konstituisaun RDTL artigu 40 no 41.

Conselho de Imprensa hanesan entidade administrative independente ida ne’ebé hola papél importante ba promove liberdade imprensa no liberdade espresaun, promove meius komunikasaun sosiál no asegura asesu jornalista iha atividade jornalíztika, promove no asegura kualidade profisaun jornalíztika. (CI)



Imprimir   Email