Balibó, Prezidente Autoridade Munisípiu Bobonaro, Jeferino Soares dos Santos, hatete loron Balibó V koñesidu tanba jornalista na’in lima ne’ebé mate hodi haklaken lia loos no terus povu Timor-Leste nian ba Mundu iha tinan 1975.
“Ita koñese no Balibó V iha tanba ita nia maun alin sira ne’ebé sai vítima, sira hala’o sira nia knar jornalizmu hodi esklarese terus ita nian ba mundu ne’ebé sira mós sai vítima ba ita nia rain,” dehan Prezidente Autoridade Munisípiu Bobonaro, iha nia diskursu Abertura ba atividade komemorasaun tinan 44 trajédia Balibó, tersa-feira (15/10), iha Balibó.
Jeferino espera katak liuhosi atividade komemorasaun sira hanesan ne’e bele motiva liután knar jornalízmu ninian, jornalista sira sei hala’o knaar ho di’ak no professional liután.
Prezidente Autoridade mós informa katak, iha tempu sira tuir mai, tuir planu Munisípiu Bobonaro nian maka sei harii mós Monumentu Balibó V iha Postu Administrative Balibó no mós alojamentu ruma ne’ebé bele atende ba bainaka sira bainhira mai vizita Balibó.
Trajédia Balibó V, koñesidu ho akontesimentu iha tinan 1975, Tropas indonézia hosi ekipa Suzi no Batallaun 2a Brigada Infantária lansa atake ba Balibó no iha loron 16 Outubru 1975, sira oho jornalista internasionál na’in lima ne’ebé halo kobertura kona-ba operasaun militár indonézia mai área Timor-Leste.
Jornalista na’in lima ne’ebé mate, mai hosi televizaun kanál 7 no kanál 9 maka hanesan, Greg Shackleton (29), Tony Stewart (21), sira na’in rua ne’e mai hosi Australia no serbisu hamutuk o Gary Cunninghan (27), hosi Nova Zelandia ne’ebé serbisu ba estasaun televizaun kanál 7 iha Melbourne. Entretantu, Briam Peters (26) no Malcolm Rennie (29), sira na’in rua husi Inglaterra no serbisu ba estasaun televizaun kanál 9 ne’ebé sentru iha Sydney.
Komemorasaun ne’e, hala’o durante loron rua, hahú hosi loron 15-16 Outubru, iha arredores Balibó ninian, ne’ebé hetan partisipasaun maximu hosi Prezidente CI, Membru no Ezekutivu CI, Sekretáriu Estadu Komunikasaun Sosiál, Prezidente Autoridade Munisípiu Bobonaro no estrutura autoridade local sira, Komandante PNTL munisípiu Bobonaro, jornalista timoroan, estudante komunikasaun sosiál UNTL no UNITAL, jornalista na’in lima hosi indonézia.