Díli – “Ha’u husu ba membru polísia sira, mídia la’ós inimigu ita (PNTL) nian, mídia ita nia parseiru di’ak ida ne’ebé maka tenke hamutuk ho nian kuandu ema ruma halo violénsia, imi (PNTL) maka fó protesaun ba sira”.
Kestaun ne’e hato’o hosi Komandante PNTL Munisípiu Díli, Superintendente Xefe, Pedro Belo iha atividade Sosializasaun lei Komunikasaun Sosiál no regulamentu sira CI nian, ba membru komandu PNTL munisípiu Díli, kuarta-feira (20/06), iha Ótel Garden Beach, Praia dos Coqueiros, Díli.
Pedro Belo dehan PNTL ho Jornalista serbisu hamutuk ba povu no nasaun Timor-Leste nune’e povu bele moris hakmatek no kontente. Nia esplika katak papél mídia nian importante tebes hodi ajuda divulga informasaun sira kona-ba atividade PNTL nian nune’e povu bele hatene.
Autoridade seguransa ne’e esplika, kuandu iha situasaun difisil nia laran maka PNTL tenke lori jornalista tama iha ne’eba hodi halo kobertura inklui PNTL fó seguransa ba Jornalista sira.
“Ha’u husu ba polisia komunitária, imi hatene liu komunidade sira. Iha loron rua liu ba xefe suku sira mós mai ona no komprende ona kona-ba lei komunikasaun sosiál. Imi (polisia komunitaria) ba koopera hamutuk ho sira kuandu mídia sira ba karik labele halo diskriminasaun,” Pedro Belo esplika.
Entretantu Konselleiru Conselho de Imprensa, Paulo Adriano da Cruz Araujo hatete PNTL munisípiu Dili hola papél ida importante tebes tanba la’ós hanesan munisípiu Díli de’it maibé hanesan kapitál nasaun nian.
“PNTL distritu Díli ne’e ha’u hare katak nia papél ne’e importante tebtebes tanba nia hare ba ita nia seguransa iha capital Díli nian iha ne’ebé nia komplesidade kazus nian, ita hare ba seguransa la’ós munisípiu Dili de’it maibé bele afeta ba nasaun tomak,” dehan Konselleiru Paulo.
Konselleiru CI ne’e mós hato’o agradese wa’in ba PNTL munisípiu Dili ne’ebé iha ona interese bele mai partilla hamutuk informasaun ho CI hodi halo harmonizasaun entre PNTL ho mídia sira.
Konselleiru dehan CI hanesan entidade regulatóriu ida ne’ebé hare ba hahalok mídia nian, nia proteje mídia sira nia direitus maibé nia hare katak ema sira ne’ebé serbisu iha mídia sira tenke tuir regras.
CI mós hala’o Sosializasaun ba daruak ba Polísia. CI mós hein katak ba future bele kontinua partilla informasaun sira kona-ba lei komunikasaun sosiál no regulamentu sira CI nia kontinua to’o ba area rural. (CI)