DILI –Atu hametin liu tan kooperasaun institusional entre Conselho de Imprensa (CI) Timor Leste ho Dewan Pers Indonesia (DPI), foin lalais ne’e, parte rua formaliza ona akordu intendimentu ka Memorandum of Undestanding (MoU) ida iha Dili.
Akordu intendimentu ne’e asina direitamente husi Prezidenti CI, Virgilio da Silva Guterres ho Ketua DPI Yoseph Adi Prasetyo “Stanley”, ne’ebe hala’o iha Otel Exelsio Resort, Dili, Sesta (11/11/2016).
Asina formalizasaun akordu entre CI ho DPI ne’e mos asiste husi parte interesadu CI nian hanesan asosiasaun jornalista sira, media nain, nomos jornalistas Timor oan sira.
Presidente CI, Virglio da Silva Guterres iha ninia diskursu hatete katak formaliza akordu ne’e importante tebes tanba CI foin mak hamrik presiza tebes tulun no apoiu husi parseiru DPI, hanesan oinsa priense no formula kazu sira ne’ebe jornalista sira no publiku sira kestiona, nune’e mos kriteria hirak ne’ebe atu fó karteira profesional ba jornalista sira.
“Ita presiza tebes kooperasaun ho DPI atu formula prosedur sira ne’ebe tuir standar ne’ebe atu promove liberdade imprensa no espresaun ninian,” hateten Virgilio Guterres.
Ketua DPI, Yoseph Adi Prasetyo mos informa katak ho formaliza akordu ne’e bele hametin liu tan kooperasaun entre instituisaun rua. Ba futuru CI iha ninia kompetensia tomak atu tau matan ba jornalista sira no media sira, nune’e mos tau as intereses publik nian hodi asesu ba informasaun ne’ebe lolos.
“Hau fiar CI sei halo ninia kna’ar diak liutan tanba media iha TL sei menus no fasil atu kontrola no halo monitorizasaun. Hau fiar mos media iha TL sei avansadu diak liutan ho hari’i ona CI,” afirma Yoseph Adi Prasetyo.
Sertifika Périto DPI Nain Lima
Husi sorin seluk, Kinta foin lalais ne’e (1/12/2016), iha salaun plenaria Conselho de Imprensa Timor-Leste, atribui sertifikasaun ba périto nain lima husi DPI ne’ebé fó ona sira nia apóiu hodi estabelese regulamentu no padraun balun ne’ebé CI presiza.
“Sertifikadu ne’e hanesan apresisaun husi CI ba périto sira, tanba kontribui ona ba hamosu regulamentu no padraun sira. Ne’e hanesan kontinuasaun husi akordu ne’ebé asina ona iha Jakarta iha loron 29 Agusto 2016.” dehan Prezidenti Conselho de Imprensa Virgilio da Silva Guterres.
Nia mos aprofunda katak sertifikadu apresisaun ne’e, la’ós atu hakotu relasaun servisu, maibé hametin liu tan kooperasaun entre CI ho DPI ba oin.
Péritu na’in 5 maka simu sertifikadu apresiasaun ne’e mak Herutjahjo Soewardoso, ne’ebé fó apóiu ba estabelese prosedimentu no padraun ba disputa mídia; Samsuri ne’ebe mak fo apóiu ba formula padraun organizasaun jornalista no teste kompeténsia; Deritawati Sitorus ne’ebe mak fo apóiu ba formula padraun organizasaun mídia no empreza mídia iha Timor-Leste; Chistiana Chelsia Chan no Reza Andreas ne’ebé mak fo apóiu ba estabelese prosidementu operasionál ba atende violénsia hasoru jornalista. Péritu hirak ne’e mós fó apóiu hodi hamosu mekanizmu ba rejistu mídia, no prosidementu ba relasaun kooperasaun institusionál.
“CI hanesan parseiru servisu DPI, ne’ebé iha nanis ona akordu kooperasaun, tanba ne’e DPI sei apóiu nafatin, bainhira CI presiza iha área legál sira, atu fasilita servisu CI ba futuru, liga ho dezenvolvimentu mídia sira nian, hodi garante profisionalismu jornalista sira nian liberdade espresaun no imprensa iha Timor-Leste.” afirma Imam Wahyudi, reprezentante DPI ne’ebe asiste serimonia atribuisaun sertifikadu apresiasaun ba perito DPI nain lima ne’e.
Iman Wahyudi mos hateten katak sertifikadu apresisaun ne’e, hanesan prezenti furak ba périto sira ne’ebé fó ona nia kontribuisaun ba CI no nia parte sei entrega sertifikadu ne’e direita ba périto sira ne’ebé lamarka prezensa, tanba fila ona ba Indonesia hodi kumpri sira nia servisu iha DPI.
Hanesan membru DPI, Wahyudi mós haksolok no agradese ba CI nia apresiasaun, tanba foin hahu akordu kooperasaun, maibé serbisu la’o di’ak no susessu. CI