Liuhosi aprezentasaun temátika iha konferénsia internasionál Conselho de Imprensa (CI), 09/05/2017, salaun Delta Nova, iha ámbitu tinan ida CI ho tema “Relasaun Institusionál ba Hametin no Promove Liberdade Imprensa no Liberdade Espresaun”, hamosu komitmentu boot atu estabelese kooperasaun entre Conselho de Imprensa (CI), Prokuradoria Jerál da Repúblika (PGR) no Polísia Nasionál Timor-Leste (PNTL) hodi promove liberdade imprensa no liberdade espresaun.
Adjunta Prokuradoria Jerál da Repúblika, Zelia Trindade hatete atu promove liberdade imprensa no liberdade espresaun iha Timor-Leste ne’e kompeténsia Conselho de Imprensa nian maibé importante tebes atu hametin mós kooperasaun entre PGR ho CI hodi kontribui ba promove liberdade imprensa iha TL.
“Conselho de Imprensa ho Ministériu Públiku bele ko’alia hamutuk oinsa para ita serbisu ba oin fó informasaun ba malu bainhira iha prosesu ruma maka Conselho Imprensa infrenta alein de dixiplár mós iha faktu ne’ebé maka konstrui krimi bele liga ba Ministériu Públiku entermus de forma kooperasaun entre instituisaun sira nian, maibé ita bele halo liuhosi memorandu ruma bele fasilita di’ak liutan ita nia serbisu ka funsionamentu entre instituisaun sira,” Adjunta Zelia Trindade hato’o kestaun ne’e iha nia aprezentasaun iha konferénsia internasionál CI nian iha salaun Delta Nova, Tersa, 09/05/2017.
Adjunta Zelia esplika asuntu relasaun institusionais entre CI ho PGR importante tebes ne’ebé iha posíveis Kampu ka estabele kooperasaun entre CI ho PGR hodi reforsa promosaun liberdade imprensa no liberdade espresaun iha Timor-Leste.
Komandante Jerál PNTL, Komisáriu, Julio da Costa Hornai, hatete papél Conselho de Imprensa importante tebes ba dezenvolvimentu atividades orgaun komunikasaun sosiál iha Timor-Leste hodi promove no asegura atividade jornalísta sira nian ho profesionalízmu no respeitu padraun ne’ebé as no kualidade.
“Ami prontu nafatin koopera ho ita boot sira (Mídia), tanba Mídia sai fatór importante atu informa buat di’ak, buat aat, tantu serbisu públiku no instituisaun privadu sira nian ba públiku para ema hotu hatene nune’e ita hotu hamutuk para dezenvolve ba oin ita nia rai ida ne’e,
PNTL prontu nafatin atu fó kualker informasaun saída de’it maka jornalísta sira presiza atu fó sai ba públiku hodi hatene.
Komandu PNTL ne’e husu mós ba jornalísta sira atu bele ka’er metin padraun kódigu Étika Jornalístika bainhira halo reportajen nune’e labele hamosu notísia sensasionál de’it perante públiku.
Iha okaziaun hanesan Prezidente Autoridade Nasionál Komunikasaun (ANC), António Brígido Correia, hatete atu dezenvolve seitór komunikasaun iha Timor-Leste, importante tebes atu serbisu hamutuk entre orgaun sira estadu nian nune’e bele hasa’e di’ak liutan kualidade de informasaun ba públiku.
“Ita (CI ho ANC) presiza duni serbisu hamutuk hodi asegura implementasaun idak-idak nia kna’ar ho di’ak no loos. Hamutuk ita bele promove ita nia sosiedade iha alta informasaun katak ita nia sosiedade iha koñesimentu ne’ebé ita preve,” Prezidente ANC, António Brígide dehan.
Entretantu Sekretáriu estadu Komunikasaun Sosiál (SECOMS), Nélio Isaac Sarmento, hatete iha asuntu tolu (3) importante polítika Estadu Timor-Leste liuhosi SECOMS atu bele garante no promove liberdade imprensa no liberdade espresaun.
Primeiru, polítika (kebijakan) nasionál ba komunikasaun sosiál liuhosi programa integradu entre autoridades, sosiedade no mídia rasik. Segundu, lei ne’ebé bele fasilita ka regula atividade jornalísta sira. Terseira, kompeténsia hosi komunikasaun rasik maka hanesan instituisaun sira ne’ebé sai hanesan fontes de informasaun ba ita nia públiku tenke hato’o informasaun ho kualidade ba sosiedade.
SECOMS, Nélio Isaac dehan ho prinsípiu tolu (3) ne’e maka ita bele fó ona solusaun ba transparansia no bele dezenvolve TL liuhosi informasaun ne’ebé públika hosi mídia sira.
Entretantu iha abertura konferénsia internasionál, Prezidente CI Virgílio da Silva Guterres hato’o agradese wa’in ba parseiru hotu-hotu inklui bainaka sira hosi nasionál no internasionál sira nia kontribuisaun no kolaborasaun iha eventu komemorasaun tinan ida CI liuhosi konferénsia internasionál durante loron rua (2) hosi 09-10/05/2017, iha salaun Delta Nova, Comoro, Díli.
Conselho de Imprensa nu’udár entidade administrativa independente ida no hala’o ninia atribuisaun no kompeténsia ne’ebé la submete ba diresaun ka orientasaun sira husi podér polítika nian. CI nia misaun prinsipál maka atu promove liberdade espresaun no liberdade imprensa iha railaran. (CI)