Enkontru ne’e hodi Kongratula José Ramos Horta, ne’ebé sei hala’o Misaun foun nu’udar Prezidente Repúblika eleitu durante tinan lima ba periodu 2022 to’o 2027.
Iha oportunidade ne’e, Prezidente Conselho de Imprensa konvida Laureadu Nobel ba Paz atu partisipa no halo abertura ba Konferénsia Nasionál no Internasionál Forum Dialogu Dili, ne’ebé tuir planu sei hala’o durante loron rua, hahu iha loron 25/08/2022.
Conselho de Imprensa mos husu Prezidente Eleitu nia apoiu hodi halo advokasia ho orgaun soberania sira seluk, nune bele desidi loron 16 fulan Outubru, nudar Loron nasionál Liberdade Imprensa.
Figura numeru dauluk iha Conselho de Imprensa, konvida Prezidente Eleitu atu partisipa nafatin iha Komemorasaun Trajedia Balibo, iha loron 16 fulan Outubru tinan 2022, ne’ebé kada tinan CI sempre hala’o iha Postu Administrativu Balibo Munisípiu Bobonaro. Alem de ne’e CI mos husu antigu jornalista ne’e atu halo advokasia hodi apoiu mídia konvensionál sira.