CI Realiza Treinamentu Basic Online Fact Checking ba Estudante Universitáriu KomSos UNTL no UNITAL

Dili, Atu estudante universitáriu Departamentu Komunikasaun Sosiál UNTL no UNITAL sensivel hodi luta kontra disinformasaun no notísia falsu iha Nasaun no  bele uza abilidade e koñesimentu iha utiliza ferramenta ba basic online fact checking nomós hatene matadalan ba jornalista no públiku iha utiliza mídia sosiál, Conselho de Imprensa de Timor-Leste (CI), realiza Treinamentu Basic Online Fact Checking hodi sensibiliza estudante universitáriu komunikasaun sosiál kona-ba esforsu kombate disinformasaun no notísia falsu iha Nasaun.

Treinamentu loron dahuluk loke husi Membru CI, Konselleiru, Expedito Loro Dias Ximenes, iha Salaun Konferénsia CI, Quintal Boot, Tersa-feira, 17/8/2021, ne’ebé foku ba estudante komunikasaun sosiál UNTL, “dala barak iha étika jornalizmu nian, kala aprende iha universidade, katak iha prinsípiu barak ke dala barak ita ladún halo knar ho di’ak, ida maka dala barak ita hetan kritika tanba ita halo notísia ne’ebé maka la tuir ona kódigu étika jornalistiku.” 

Treinamentu loron daruak loke husi Membru CI, Konselleiru, Otelio Ote, nafatin iha Salaun Konferénsia CI, Quintal Boot, Kuarta-feira, 18/8/2021, ne’ebé foku ba estudante komunikasaun sosiál UNITAL, “treinamentu ida di’ak tebetebes, ha’u la hatene antes ne’e imi partisipa ona ka lae maibé issue ida ne’e kona-ba utilizasaun mídia sosiál no notísia hoax ho notísia falsu, sai parte ida importante no dezenvolve maka’as iha era sira ikus ne’e, era teknolojia komunikasaun maka’as loos, diferente ho momentu okupasaun, ita la koñese teknolojia barak.”

“Investe imi nia an halo didi’ak tanba aban bainrua imi sai parte ida husi ami, espera ita-boot sira sai jornalista, atu hasoru loloos, faktu loloos, ita bele ajuda sensibiliza komunidade sira kona-ba utilizasaun meiu komunikasaun sosiál no utilizasaun mídia sosiál,” hameno Konselleiru Otelio.

Conselho de Imprensa, agradese United Nations Educational, Scientific and Cultural Organizasaun - UNESCO ba apoiu tomak hodi realiza Treinamentu Basic Online Fact Checking. 

Materia iha treinamentu loron rua ne’e maka Social Media Guideline for Journalism, ne’ebé fasilita husi Diretór DADM CI, Alberico da Costa Junior. 

Digital Security and Basic Online Fact Checking nu’udar matéria treinamentu husi Assessor Information Technology – IT CI, Armindo de Jesus, hodi kompartilla abilidade no koñesimentu oinsá identifika disinformasaun no notísia falsu.
Total partisipantes iha treinamentu ne’e hamutuk nain 100.