Kobertura Mídia La Iha Balansu Jéneru

“Ita sei kontinua hare iha Timor-Leste, wainhira kobertura maluk mídia sira halo fó nafatin enfaje, halo kobertura maka’as ba área sira ne’ebé domina hosi mane, ita ladún fó importánsia, ladún fó enfaje, atu halo kobertura ba atividade, ba área sira ne’ebé ita nia maluk feto sira ka komponente sira seluk iha ita nia sosiedade involve ba,” dehan SEII.

Sekretáriu Estadu Igualdade no Inkluzaun hato’o hanoin ne’e iha aprezentasaun kona-ba Papel Mídia Iha Promove Inkluzaun no Igualdade Jéneru Liu Hosi Reportajen Sensitive Jéneru, durante Konferénsia Internasionál Dili Dialogu Forum 2019, (10/05/2019).

Maria Jose Fonseca reforsa katak, atu hari sosiadade ne’ebé demokrátiku mídia iha papel importante atu wainhira halo kobertura tenke mós hare ba komponente hotu sosiedade nian.

Iha oportundiade ne’e, oradór Internasionál hosi Conselho de Imprensa Indonesia, Iman  Wahyudi, apresenta materia kona-ba oinsá atende no rezolve disputa iha mídia no iha mídia sosiál.

“Asuntu importante iha ne’e mak oinsá maka bele halo diferensa entre mídia no sosiál mídia, fasil atu halo mídia tanba ne’e mosu fake mídia ka mídia abal-abal, iha istilah  Indonesia,” hateten Imam.
Relasiona ho ne’e, Imam esplika oinsá atu halo diferensa mídia no mídia sosiál ninia báze maka direitu umanu, direitu ema nian ba liberdade iha komunikasaun no dezenvolve an.

Iha sesaun hanesan, odera hosi Alberico da Costa Junior, Diretór Dezenvolvimentu no Analiza Mídia CI, Maria Jose Fonseca,  Sekretáriu Estadu Igualdade no Inkluzaun-SEII, iha aprezentasaun foka ba papél mídia iha promove inkluzaun no igualdade jéneru liu hosi reportajen sensitive jéneru.

Iha sesaun paralelu ne’e, iha salaun diferente, iha mos aprejentasaun kona-ba independensia editorial versus independensia ekonomi jornalista, ne’ebe hato’o hosi  Vise Prezidente Timor-Leste Press Union, Manuel Pinto, modera hosi Caetano Alves, Tékniku Profisionál Diresaun Dezenvolvimentu no Analiza Mídia CI.

Manuel Pinto, esplika kona-ba saida no tanba saida mak independensia redasaun tenke iha liga liu ba Lei Komunikasaun Sosial, “iha ne’eba nia hatete kona-ba Conselho redasaun, politika redasaun, sasan sira ne’e maka buat ida ita hanaran editorial.”


Imprimir   Email