Lian Portugues Nudar Lian Rezisténsia Ba Povu Maubere

Adelino Gomes hato’o lia fuan ne’e wainhira koalia iha seksaun apresentasaun ho tema, “Dezafiu Jornalizmu Pasadu no Prezente, perante partisipantes II Dili Dialogue Forum, iha salaun São José, Katedrál, 9/5/2019.

Antigu Jornalista Portugues ne’e mos hato’o nia involvementu ba entrevista sira ne’ebé nia halo  iha inisiu Povu Maubere hahú luta ba libertasaun nasionál, iha tinan 1975.

Figura ne’e, fó sasin kona-ba Xanana  Gusmão no Taur Matan Ruak, Organizasaun RENETIL, Populasaun iha rai laran no rai li’ur, ninia esforsu ba luta ukun rasik an. 

Iha oportunidade ne’e, Prezidente Parlamentu Nasionál, Arão Noe de Jesus da Costa Amaral, hato’o nia aprezentasaun kona-ba polítika ba hametin auto-regulasaun hodi asegura livre fluxu ba informasaun.

Arão Noe kongratula Conselho de Imprensa de Timor-Leste ba aniversáriu ba dala tolu no ba jornalista hotu ne’ebé selebra loron mundiál liberdade imprensa ba dala 26. Figura ne’e fó mós parabéns ba Timor-Leste tanba tuir Index Liberdade Imprensa Mundiál, nasaun ne’e okupa númeru 84 no mós iha Asia okupa númeru 1.

Prezidente Parlamentu esplika, index ne’e hatudu katak maski nasaun foun no demokrasia ne’ebé sei nurak maibé Timor-Leste rekoñese importánsia hosi papél mídia no jornalista sira, atu fahe informasaun ba públiku nu’udar parte ida ba dezenvolvimentu demokrasia. 

Arão Noe de Jesus da Costa Amaral, louva servisu di’ak mídia nian iha Timor-Leste no apresia indivídu ne’ebé investe iha sektór komunikasaun sosiál.

Sorin seluk, Sekretáriu Estadu Komunikasaun Sosiál, Merício Juvenal dos Reis ‘Akara’, hateten papél governu iha promosaun libre fluxu ba informasaun iha públiku no mídia sosial.

Tuir nia, Governu aktual hakarak mídia livre hosi intervensaun polítika, ekonómika no podér sosiál, ba promove governasaun di’ak. Tamba ne’e Governante ne’e konvida atu iha diskusaun relasiona ho asuntu ne’e no prefere edukasaun sivika ba utilizasaun media sosiál. (CI)


Imprimir   Email