Prezidente Republika: Journalizmu Livre Mak Base Fundamental ba Demokrasia

“Ita hotu iha konxiénsia katak jornalismu livre maka báze fundamental ba kualkér rejime demokrátiku, demokrasia ida hatudu nia kualidade liu hosi nia responsabilidade no maturidade ne’ebé profisionál sira hosi komunikasaun sosiál”. 

Xefi Estadu hato’o lia ne’e wainhira ensera no entrega premiu Conselho de Imprensa ba jornalista sira, iha konferénsia Internasionál Dili Dialogu Forum, iha Salaun São José, Katedrál, Dili (10/05/2019).

Tuir Prezidente, media no jornalista sira ninia knar importante, “Jornalista lubun ida hatudu sira nia kompromisu ho barani involve an no buka transmite informasaun ba violasaun direitu umanu iha ita nia rai, hosi Australia, hosi Olanda, Portugal, Indonesia, no nasaun sira seluk iha Europa, Amérika, Ázia no Palop. Barak mate tanba hakarak garante direitu povu Timor-Leste nian ba auto determinasaun, hahú kedas iha tinan 1975.” “esplika figura númeru primeiru iha paiz ne’e.

Lu Olo reforsa katak, ezisténsia Conselho de Imprensa de Timor-Leste hanesan kontribuisaun boot ida ba garantia kualidade informasaun, “wainhira informasaun laiha kualidade no la kredibel bele lori sidadaun sira foti desizaun ne’ebé sala no laiha mós kualidade entermus de serteja e seguransa ba sira nia direitu, “ haktuir Prezidente.

“Demokrasia para bele ko’alia, demokrasia para bele rona,” dehan Prezidente Repúblika.

Xefi Estadu mós felisita Conselho de Imprensa hodi fó apresiasaun espesiál ba Prezidente Conselho de Imprensa, Virgílio da Silva Guterres, ba esforsu tomak dezenvolve Conselho de Imprensa. 

Fransisco Guterres “Lu Olo” mos rekoñese no kongratula Jornalista sira hotu ninia responsabilidade no servisu. (CI)


Imprimir   Email