Governu Ho Conselho de Imprensa Sei Hare Proposta Lejizlasaun ba Sosiál Mídia

“Tanba dala ruma ita hanoin buat ne’ebé mak fó sai iha sosiál mídia, ida ne’e maka lia los, haluha tiha katak plataforma ne’e mós iha nia nain e iha interese organizasaun ba sosiál mídia”, esplika Fidelis Manuel Leite Magalhães, wainhira Representa Primeiru Ministru, ofisiálmente loke II Dili Dialogue Forum, iha Salaun São José, Katedrál, Dili (09/05/2019).

Nia hatete, públiku persiza pergunta no kestiona informasaun hirak ne’ebé iha sosiál media. “Governu hanoin ba kolega jornalista sira importante mós atu ta’es didi’ak informasaun sira ne’ebé mosu iha sosiál mídia tanba se ita la kuidadu, ida ne’e rasik halo lakon prioridade ba ita nia definisaun  saida mak ita nia preokupasoens,  haktuir Ministru Reforma Legislativa no Asuntu Parlamentares.

Fidelis Manuel Leite Magalhães promete katak, sei diskuti kona-ba lei ou proposta legislativa sira relasaun ho media sosiál liga ba notisia falsa sira (fake news), “Ami sei ko’alia fali ho Conselho de Imprensa, para lejizlasaun ne’ebé ita propoin karik, lejizlasaun la hamate direitu fundamental sidadaun atu asesu ba informasaun,” esplika Fidelis Magalhães.

Oradór ba II Dili Dialogue Forum mai hosi Nasionál no Internasionál liuliu Conselho de Imprensa sira iha sudueste aziátiku no Pasífiku hanesan hosi Indonesia, Australia, Filipina, Thailandia, Myamar no seluk tan inklui jornalista senior hosi Portugal Adelino Gomez.

Konferénsia altu nivel ne’e, partisipa hosi ema kuaze 300 ne’ebé mai hosi Jornalista, Responsavel Orgaun no Meius Komunikasaun Sosiál, Asosiasaun Jornalista, Estudante Departementu Komunikasaun Sosiál hosi UNTL no UNITAL, Agensia Lokal no Internasionál, Embaixadór sira, Membru Governu no Prezidente Parlamentu. (CI)


Imprimir   Email