Previous Next

CI no ANC Konkorda Hamosu Nota Servisu Hamutuk

Dili – Conselho de Imprensa de Timor-Leste (CI) ho Autoridade Nasionál Komunikasaun (ANC) sei kria nota servisu hamutuk iha tempu besik.

Asuntu ne’e nu’udar  tema prinsipál iha enkontru entre Diretór Ezekutivu (CI), Rigoberto Monteiro, akompaña hosi Diretór Diresaun Komunikasaun Sosiál, Relasaun Institusionál no Kooperasaun (DCSRIC)-CI, Altino da Cruz Freitas, Tékniku Profisionál Diresaun Apoiu Juridika (DRAJ)-CI, Fransisco da S. B. Cunha, ho Prezidente Autoridade Nasionál Komunikasaun - ANC, João Olivio Freitas, Asesór Jurídiku ANC, Adilson Semedo no Sekretáriu Ezekutivu ANC, Maria Agata, iha salaun enkontru ANC, Merkadu Lama, Dili, Segunda-feira (22/2/2021).

“Conselho de Imprensa ho ANC tenke dezenvolve nota entendimentu ida ka akordu kooperasaun ba tempu naruk ne’ebé nia objetivu asegura televizaun ka rádiu ne’ebé rejistu iha ne’e,” hato’o DE CI. 

Prezidente ANC, agradese no konsidera enkontru ne’e atu parte ANC no CI bele fahe informasaun ba malu tuir ida-idak ninia kompeténsia servisu.

“Ho komunikasaun sira hanesan ne’e, ita bele hatene lakunas saída mak akontese daudaun iha ita nia servisu sira, atu trata buat sira ne’e sai di’ak liután,” esplika Prezidente ANC.

Liu hosi enkontru ne’e, iha tempu besik parte rua sei halo diskusaun téknika hodi prepara nota servisu hamutuk entre CI ho ANC. 

Bazeia ba Lei Komunikasaun Sosiál, loron 19 fulan Novembru, Artigu 25 kona-ba órgaun komunikasaun sosiál estranjeiru, iha aliña 1 hateten, órgaun komunikasaun sosiál estranjeiru nian ne’ebé mak hakarak atu halo distribuisaun ka tau korrespondente ida iha Timor-Leste tenke halo rejistu órgaun no halo akreditasaun jornalista nian husi Conselho de Imprensa.

No iha Artigu 26, kona-ba lisensiamentu frekuénsia hateten, meiu komunikasaun sosiál radiofóniku no televizivu nian sira bele funsiona bainhira iha lisensa frekuénsia nian ne’ebé Autoridade Nasionál Komunikasaun nian maka sei fó, atu asegura jestaun loloos espetru radioelétriku nian. 

Iha artigu 28, kona-ba rejistu, haktuir iha alinea dahuluk hateten Órgaun no meiu komunikasaun sosiál sira tenke halo rejistu ida ba-iha Conselho de Imprensa. 

Enkuantu alinea daruak haktuir, rejistu ne’e medida mak administrativa, la’ós nu’udar aktu autorizasaun nian. (CI)

 


Imprimir   Email