Membru Conselho de Imprensa Períodu Daruak Simu Pose husi Parlamentu Nasionál

Atividade Hare nain: 3505

Díli – Membru Conselho de Imprensa de Timor-Leste (CI) na’in lima (5) simu pose husi Parlamentu Nasionál (PN), ba mandatu daruak períodu tinan 2021-2025.

Membru Conselho de Imprensa na’in lima (5) hanesan Virgílio da Silva Guterres (Prezidente), Benevides Correia Barros (membru), Expedito Dias Ximenes (Membru), Francisco Simões Belo da Costa (membru) no Otelio Ote (membru), simu pose iha loron 10 Fevereiru 2021, iha uma fukun Parlamentu Nasionál. 

Prezidente Parlamentu Nasionál, Aniceto Longuinhos Guterres Lopes hato’o dezeiju susesu ba membru na’in lima iha mandatu durante tinan haat.

“Ho mandatu ida ne’e, Conselho de Imprensa presiza motiva órgaun komunikasaun sosiál sira no jornalista sira atu iha kapasidade di’ak liutan ba jere kualidade informasaun, serbisu ho profesionalízmu, integridade étika ho jestaun no publikasaun ne’ebé kontribui ba promove valores sosiál, demokrasia no direitus umanus,” esplika Prezidente Parlamentu Nasionál, Aniceto Longuinhos Guterres Lopes.

Prezidente Conselho de Imprensa, Virgílio da Silva Guterres kompromete atu kontinua tau matan no promove Liberdade imprensa no Liberdade espresaun iha Timor-Leste. 

“Iha mandatu daruak nian, esforsu hotu sei foka ba oinsa atu konsolida KI no mos setor komunikasaun sosial liuhosi revizaun ba enkuadramentu legal atividade, atribuisaun karteira profisional difinitiva ba jornalista hotu-hotu, inklui mos monitorizasaun nebe efikaz no attitude nebe interventiva liu tan ba meius komunikasaun sosial sira no kapasitasaun ba profisional media nian hodi hadi’a no hasa’e kualidade teknika atu nune’e sira bele kumpri ho loloos preseitu legal no etika nebe aplika iha setor komunikasaun sosial nian,” prezidente CI, Virgílio hato’o liuhusi diskursu bainhira simu pose husi PN.

Prezidente Virgílio dehan Ba Conselho de Imprensa, liafuan xave mak liberdade. Liberdade de imprensa no liberdade de espresaun. Tanba ne’e tarefa primordial KI nian mak oinsa atu garante liberdade jornalista sira nian atu hala’o sira nia knar hodi prense direitu sidadaun nian atu informasaun ne’ebé loloos ho momoos. Garante liberdade sidadaun nian atu asesu ba informasaun. Garante liberdade no independénsia editoriál meius komunikasaun sosiál nian hodi hala’o sira nia funsaun nudar instrumentu “controle social” nu’udar ejijénsia hosi sosiedade demokrátika tuir Konstituisaun haktuir. 

Haktuir iha lei komunikasaun sosiál, artigu 18 alinea 1 dehan lista membru na’in lima Conselho de Imprensa nian ho indikasaun Prezidente Eleitu nian sei fó sai iha Jornál Repúblika, tuir pedidu Parlamentu Nasionál nian, to’o loron lima hafoin liu tiha komunikasaun nu’udar preve iha númeru 4 husi artigu 23.

Iha artigu 18, Alinea 2 haktuir membru sira Conselho de Imprensa nian sei hetan pose husi Prezidente Parlamentu Nasionál to’o loron 10 hafoin iha tiha ona komunikasaun nu’udar temi iha númeru ida uluk. (CI)