Díli, 18/1/2021 – Segunda-feira ne’e, liuhusi sesaun plenária, Parlamentu Nasional nomeia ona Expedito Dias Ximenes (Peritu Komunikasaun Sosiál) no Benevides Correia Barros (Jurista) hodi reprezenta PN ba iha Conselho de Imprensa de Timor-Leste (CI).
Expedito Dias Ximenes kandidata husi Partidu Congresso Nacional de Reconstrução de Timor (CNRT) no Benevides Correia Barros kandidata husi Partidu Demokrátiku (PD).
Depois de membru Parlamentu Nasionál sira hili tiha membru na’in rua liuhusi votu sekretu, Prezidente Parlamentu Nasionál, Aniceto Longuinho Guterres, anunsia kedas rezultadu votasaun iha sesaun plenária iha Parlamentu Nasionál.
Expedito Dias Loro Ximenes kompete ho Jordão Henrique no ikus mai PN hili Expedito ho votus 36 no Jordão ho votus 29. Entretantu Jurista, Benevides Correia Barros eleitu ho votus 53 afavor, kontra 6, abstensaun 4, branco 2 no nulu 0.
“Ho eleisaun ohin, Parlamentu konsege hili nia membru na’in 2 maka sr. Expedito Dias Ximenes no sr. Benevides Correia Barros,” anúnsiu husi Prezidente PN.
Expedito Dias Ximenes, Benevides Correia Barros,Virgílio da Silva Guterres, Francisco Belo Simões da Costa, Otelio Ote sei lidera Conselho de Imprensa ba mandatu daruak períodu tinan haat (2021-2025).