Atividade

Prezidente CI no Konselleiru Hugo Fernandes sai Oradór iha Semináriu Nasional AJTL

Dili – Prezidente Conselho de Imprensa de Timor-Leste (CI), Virgílio da Silva Guterres no Membru CI, Konselleiru, Hugo Fernandes, sai oradór iha Semináriu Nasionál ho tema “Jornalizmu entre Dezafiu no Oportunidade.” 

Prezidente Conselho de Imprensa de Timor-Leste (CI), Virgílio da Silva Guterres, ko’alia kona-ba esénsia husi jornalizmu, podér editorial labele sai fali podér ba polítika no ekonómika hodi atinje ema balun nia objetivu no husu ba AJTL atu halo planu formasaun barak ba membru AJTL sira hodi nune’e bele komprende didi’ak valóres jornalístiku.

Membru CI, Konselleiru, Hugo Fernandes, iha sesaun aprezentasaun ko’alia kona-ba Diretu Umanu no Mídia. “Fó defeza ba direitu Umanu ema nian ba informasaun, liuliu ema sira ne’ebé ezerse direitu ne’e hanesan jornalista, tenke seguru. Proteje Jornalista iha hala’o knar,” esplika Konselleiru Hugo.

Konselleiru Hugo sujere, “hametin liután jornalista sira nia koñesimentu, tenke partisipa iha semináriu ou workshop ho maxima, tanba Jornalista, halo servisu importante hodi halo nakonu nesesidade ema ba informasaun, tanba sein informasaun ema sei la hatene saida mak sira nia direitu.”

Semináriu Nasionál ne’e realiza husi Asosiasaun Jornalista Timor-Lorosa’e (AJTL), hodi komemora aniversáriu AJTL ba dala 21 no Natal hamutuk.