Dili - Conselho de Imprensa de Timor-Leste (CI), atribui karteira profisionál ba jornalista nain 16, feto 5, mane 11 no atribui mós sertidaun rejistu ba órgaun komunikasaun sosiál ho total 13, iha Delta Nova, Sesta, 18/12/2020.
Iha Abertura serimónia atribuisaun karteira profisionál ba jornalista no atribuisaun sertidaun rejistu ba órgaun komunikasaun sosiál sira, Prezidente CI, Virgilio da Silva Guterres, kongratula Jornalista sira ne’ebé simu ona karteira profisionál jornalistiku no órgaun komunikasaun sosiál sira ne’ebé simu ona sertidaun rejistu. Prezidente CI hato’o katak, “haksolok boot ba Conselho de Imprensa tanba maski ho situasaun difisil. iha situasaun polítika, situasaun pandemia COVID ninian, Conselho de Imprensa konsege, molok tinan hotu, halo serimónia para atribui karteira profisionál ba jornalista sira, tanba atribuisaun karteira profisionál ba jornalista sira sai hanesan atividade prinsipál ida ne’ebé Lei fó ba Conselho de Imprensa.”
Prezidente CI, esplika prosesu estájiu dadauk no ba futuru wainhira ema ida hakarak sai jornalista no hetan karteira profisionál, “ho prosesu sira ne’ebé la’o durante ne’e ita hare katak prosesu estájiu seidauk la’o hanesan ideal, katak la’ós Conselho de Imprensa maka atu fasilita ema atu tuir estájiu, ema ne’ebé mak hakarak sai jornalista ne’e maka tenke ba dere órgaun komunikasaun sosiál ou meiu komunikasaun sosiál sira nia odonatan atu hato’o pedidu atu halo estájiu iha ne’ebá e too agora komunikasaun entre Conselho de Imprensa ho órgaun komunikasaun sosiál sira seidauk hetan konsensu tanba Lei hatete katak ema ne’ebé ba halo estájiu tenke hetan saláriu katak ema ne’e ba halo estájiu, hetan saláriu ne’ebé labele ki’ik liu saláriu mínimu nasionál, entaun ne’e tenke iha komunikasaun ne’ebé trankulente ho mídia nain sira atu hare vantajen saida mak sira hetan husi simu maluk sira ne’ebé mak halo estájiu, entaun ba oin espera ita bele too iha formatu ida ne’ebé di’ak.”
“Agora dadauk, iha estájiariu nain hira ne’ebé sente liu tanba Conselho de Imprensa nia kooperasaun ho UNESCO, tanba ne’e fasilita sira estájiu iha mídia lubuk ida e ikus mai sira tuir ezame,” informa Prezidente CI.
Iha fatin hanesan, Expeditu Dias Ximenes, Jornalista GMN, ne’ebé simu karteira profisionál, agradese ba Conselho de Imprensa no sujere atu hadi’ak liután ezame Kompeténsia ne’ebé Conselho de Imprensa hala’o daudaun atu nune’e iha eskollia ema ne’ebé hetan karteira profisionál tenke liu ona ezame Kompeténsia nune’e bele sente matenek lori sentidu kle’an ba iha jornalista sira.
Partisipa iha serimónia ne’e, parseiru servisu CI nian hanesan MAPKOMS, MNEC, UNDP, UNESCO, Embaixada Portugal, Asosiasaun Jornalista, Mídia Nain, Diretór Mídia, TATOLI, JU,S, Camoes, PDHJ, CNE, PNTL, Asosiasaun Vítima, PFM, Jornalista, Membru no Ezekutivu CI ho total ema maizumenus 130. .