Previous Next

CI no UNDP, Ensera Treinamentu Jornalizmu Kompriénsivu ba dala IV

Dili - Iha enseramentu Treinamentu Jornalizmu Kompriénsivu ba dala IV, Xefe Unidade Governansia UNDP/UNDP Head Of Governance, Youngchan Kim, hateten katak UNDP kontente ho seriedade jornalista mídia online sira iha aprende, “ha’u esperaimi aprende skill barak, kona-ba kobertura nomos étika ba jornalista nian, ami kontente tebes hare imi ho idade joven, imi hatudu motivasaun no seriedade hodi aprende koñesimentu foun, imi mós hili profisaun ida ne’ebé ho responsabilidade boot liuliu atu sai mensajeiru ba sosiedade tomak.”

“Ha’u apresia tebes Estadu nia komitmentu liu husi Konstituisaun, asegura liberdade imprensa, liuliu imi nia luta ba liberdade imprensa no liberdade espresaun bele metin liután iha Timor-Leste,” dehan Xefe Unidade Governansia UNDP.

Xefe Unidade Governansia UNDP remata ho enkoraja jornalista sira atu kontinua serve públiku ho di’ak liután, “iha períodu COVID – 19, imi mós hetan impaktu hanesan ema hotu sente, maibé imi nia dedikasaun atu serve públiku ho informasaun ne’ebé kredivel, balansu no responsavel, kontribui pozitivamente ba públiku nia desizaun ba medida prevensaun, governasaun di’ak no demokrasia iha Timor-Leste.” 

Iha oportunidade hanesan, Diretór Rezidente KOICA /Country Director KOICA, Kim Sikhyon, iha nia breve Palavra informa katak, “hahú tinan oin, KOICA sei implementa programa foun hasa’e Kapasitasaun jornalizmu iha Timor-Leste.”

Prezidente Conselho de Imprensa agradese ba apoiu ne’ebé hetan husi UNDP no KOICA iha area Kapasitasaun ba jornalista sira, “Conselho de Imprensa hanesan uluk, oras ne’e no ba nafatin, prontu nafatin atu koopera ho parseiru sira liuliu atu kapasita ita nia maluk jornalista sira atu sai profisionál liután, atu iha kapasidade intelektuál maka’as  liután,  ho nune’e sira nia obra jornalistika atu fó informasaun ba públiku sai kualidade liután.”

Francisca da Costa Soares, Jornalista Sentru Mídia Investigativu (SMI) no Orlando Magno, Jornalista Lafaek News, hateten katak treinamentu ne’e ajuda tebes hasa’e kapasidade iha mundu jornalizmu nian no espera kontinua realiza treinamentu ba jornalista mídia online sira iha tempu sira tuir mai. 

Partisipa iha enseramentu ne’e mak Xefe Unidade Governansia UNDP no ekipa, Diretór Rezidente KOICA no ekipa, Prezidente Conselho de Imprensa de Timor-Leste (CI) no ekipa, jornalista mídia online ho total 22, feto 10 no mane 12.

Treinamentu realiza tanba servisu hamutuk entre Conselho de Imprensa de Timor-Leste (CI) no Ajénsia Programa Nasoens Unidas ba Dezenvolvimentu (PNUD/UNDP) ho apoiu fundus husi KOICA.





Imprimir   Email