Previous Next

Prezidente CI Sai Oradór iha Semináriu Nasionál IOB

Díli – Prezidente Conselho de Imprensa de Timor-Leste (CI), Virgílio da Silva Guterres, sai nu’udar oradór iha semináriu nasionál ho tema “Valór Polítiku no Estratéjiku Proklamasaun Independénsia RDTL 28 Novembru 1975”, ne’ebé organiza husi universidade Institute of Business (IOB).

Semináriu ne’ebé realiza iha Auditorium IOB Plaza, Fomento 2, Díli, Tersa-Feira, 24 Novembru 2020, Prezidente Conselho de Imprensa ko’alia espesifikamente kona-ba “Perspetiva Joven Rezisténsia ba Liberdade Ne’ebé Timor-Leste Ohin Loron Iha”.

Prezidente Conselho de Imprensa, Virgílio Guterres, sente ónradu no priviléjiadu bele tur ho Dr. Mari Alkatiri, hodi sai oradór, ko’alia ba estudante akadémiku universitáriu sira iha ámbitu Timor-Leste atu komemora loron proklamasaun independénsia Repúblika Demokrátika Timor-Leste, 28 Novembru 1975 – 28 Novembru 2020.

Prezidente dehan hanesan segunda jerasaun, ita sei iha responsabilidade rua importante “ida, atu simu podér ida husi maun sira, segundu responsavel maka tranzmisaun valores”.

Fundadór Universidade IOB, Abel Larisina hato’o agradese wa’in ba Prezidente Conselho de Imprensa no Sekretáriu Jerál Partidu FRETILIN tanba bele fahe ona hanoin balun ba estudante sira.

Semináriu Nasionál referee organiza husi IOB no hetan partisipasaun husi Estrutura tomak IOB, Estudante IOB no Universitáriu sira seluk husi instituisaun akadémika sira iha kapitál Díli. (CI)


Imprimir   Email