MAPKOMS: Aprende Husi Pasadu, Foti Desizaun Loos Ba Futuru

Atividade Hare nain: 1356

Balibó - Conselho de Imprensa de Timor-Leste (CI) parseiru ho Centro Nasionál Chega (CNC), komemora Trajédia Balibó Five ba tinan 45, iha Postu Administrativu Balibó, Munisípiu Bobonaro hahú 13-17/10/2020. 

Loron prinsipál liu iha komemorasaun ne’e maka loron 16/10/2020, ne’ebé CI no CNC hahú ho misa agradesimentu iha Igreja Balibó. Iha fatin referee, Membru CI, Konselleiru, José Maria Ximenes, konvida sarani sira hotu Balibó nian atu hola parte iha komemorasaun ne’e hodi agradese ba kontribuisaun Jornalista nain lima ba libertasaun nasionál ne’ebé jornalista nain lima ne’e rasik mai husi nasaun Australia, Nova Zelandia no Inglaterra.

Iha loron hanesan, Conselho de Imprensa de Timor-Leste (CI) no CNC servisu hamutuk ho RTTL.EP realiza programa televizivu “Kafé Dadeer” ho tópiku “Balibó iha Pasadu, Agora no Futuru,” iha jardín Balibó Ford Hotel, Tulak Kalihau. Alein ne’e, servisu hamutuk mós ho TV-ET realiza programa “Debate Televizivu” ho tópiku “Papél Mídia Iha Prosesu Konstrusaun Nasaun,” iha Kampu Foot Ball, Suku Balibó Villa.

Iha parte loro-kraik, hafoin “Talk Show” ho tópiku “Papél Mídia ba Promosaun no Protesaun Diretu Umanu iha Ámbitu  Komemora Trajédia Balibó Five ba tinan 45,” iha jardín Balibó Ford Hotel, Tulak Kalihau, CI no CNC,  hamutuk ho konvidadus sira husi nasionál no autoridade lokal no komunidade Balibo, sunu lilin no kari ai-funan iha Balibó Flag House ka fatin mate jornalista nain lima ne’ebé hetan oho iha 16/10/1975 husi Militár Indonézia.

Ikus liu, CI no CNC, entrega prémiu CI nomós prémiu Jornalizmu ba Paz ba jornalista manán nain no iha tempu hanesan halo mós zoom meeting ho família eroína Maria Goretti iha Australia no Senior Jornalista, Adelino Gomes iha Portugal. 

Iha sesaun enseramentu, Prezidente Autoridade Munisípiu Bobonaro, Jeferino Soares dos Santos, hateten, “Ita agradese ba ita nia jornalista antigu sira, ne’ebé sai vítima ba fatin ida ne’e, maibé bele foti Balibó nia naran no mós Munisípiu Bobonaro nia naran, parabens ba jornalista sira hein katak ho esperiénsia sira ne’e jornalista sira bele halo servisu di’ak liután, hodi hamorin ita nia rai ba mundu no mós professional liután iha ita-boot sira nia servisu hodi lori lia-loos ba mundu.” 

Ministru asuntu Parlamentares no Komunikasaun Sosiál (MAPKOMS), Francisco Jeronimo, ensera no taka komemorasaun ne’e ho lia-menon katak, “ita aprende husi ne’e, ita la’o ba oin, atu foti desizaun ne’ebé loos e ita hakarak atu sasán sira ne’ebé akontese iha ne’e, labele akontese tan iha tempu ita nia no ba futuru. Dala ida tan ba komunidade Balibó, ami agradese ba ita-boot sira nia partisipasaun no prontidaun simu ami.”

Marka tan prezensa i0a serimónia ne’e Vic Minestra Turizmu no kolega eroína Maria Goretti, Sra. Maria Domingas Fernandes Alves.