Dili - Conselho de Imprensa de Timor-Leste (CI) parseiru ho Embaixada Amerika fó apoiu ba Asosiasaun Jornalista Timor-Lorosa’e (AJTL), realiza formasaun Digital Media Literacy to Combat Fake News and Hoax In Timor-Leste.
Iha sesaun Abertura, Membru Conselho de Imprensa de Timor-Leste (CI), Konselleiru, Francisco Belo, hateten katak, “hanesan ohin loron ita hatene, mundu iha tentativa boot ida, la’ós Timor de’it mak buat ida fake news ka hoax, entaun papél importante ida ne’ebé sosiedade liuliu jovens sira, jornalista sira, akademista sira, mak oinsá maka ita hamutuk luta kombate hoax ka fake news ne’e, iha meius barak ne’ebé ita halo orasida liu husi formasaun ida ne’e, manorin nain sira ka formador sira sei esplika kle’an liu oinsá maka mekanizmu ou pasu saida de’it maka oinsá atu bele apoiu ka kombate hoax ka fake news ida ne’e, maibé em jerál termu ne’ebé ita abitua atu uza hanesan sabi mak ita nia komitmentu atu verifika informasaun hotu ne’ebé publika iha liuliu iha rede sosiál sira.”
Iha formasaun ne’ebé hala’o iha salaun konferénsia CI, Quintal-Boot, 7/10/2020, Asosiasaun jornalista Timor Lorosa'e oferese ba estudante Komunikasaun sosiál UNITAL, hanesan Prezidente AJTL, Zevonia Vieira, dehan iha sesaun Abertura, “iha responsabilidade boot hakarak kapasita no dezenvolve nia membru sira, estudante komunikasaun sosiál sira nu’udar parte mós membru ne’ebé mak AJTL hakarak akumula sira, kapasita sira, fó formasaun ba sira, fó koñesimentu ba sira atu sira prontu prepara sira nia an sai jornalista professional ho kualidade iha futuru oin mai.”
Formasaun ne’e loke husi US Ambassador to Timor-Leste, Kathleen Fitzpatrick, “Embaixada Estadu Unidos orgullu apoia dezenvolvimentu Timor-Leste nian jornalista sira, ho fó apoia ba workshop kona-ba professionalism no ezatidaun jornalismu ho mídia.”
Partisipa iha formasaun ne’e, estudante komunikasaun sosiál UNITAL ho total 15, mane 9, feto 6 no apoiu ba formasaun ne’e sei la’o durante fulan 6, sei envolve estudante universitáriu komunikasaun sosiál sira husi universidade diferente.