Atividade

CI Realiza Konferénsia Mídia Nain Hodi Hili Reprezentante ba CI Períodu 2020 – 2024

Dili – Membru Conselho de Imprensa de Timor-Leste (CI), Konselleiru, José Maria Ximenes, aprezenta relatóriu servisu hanesan reprezentante Mídia Nain iha CI durante tinan haat hahú 2016 – 2020 iha konferénsia Mídia nain hodi hili reprezentante Mídia Nain tuur iha Conselho de Imprensa ba períodu 2020 – 2024.

“Bazeia ba Lei Komunikasaun Sosial no Estatutu Conselho de Imprensa nian, knaar dahuluk Membru Conselho de Imprensa maka harii instituisaun Conselho de Imprensa hodi fó aspetu profisionál nune’e maka Conselho de Imprensa harii estrutura ezekutivu,” relata Konselleiru José. 

Konferénsia ne’e loke husi Prezidente CI, Virgílio da Silva Guterres no iha diskursu, Prezidente CI hateten katak, “luta ba promove liberdade imprensa no liberdade espresaun sei naruk.” 

Nu’udar Prezidente Meza ba konferénsia ne’ebé realiza iha salaun konferénsia Delta Nova, 15/9/2020, maka Diretór Komunikasaun Sosial, Relasaun Institusional no Kooperasaun (DCSRIC), Altino da Cruz Freitas.

Hola parte iha konferénsia ne’e órgaun komunikasaun sosiál hamutuk 18, maibé órgaun komunikasaun sosiál 13 de’it mak tuir vota no órgaun komunikasaun sosiál 5 la tuir vota.

Husi konferénsia ne’e, rezulta Otelio Ote, eleitu ba tuur iha CI ba períodu 2020 - 2024. 

Iha sesaun enseramentu, CI atribui Sertidaun Rejistu ba Órgaun Komunikasaun Sosiál 28.
Partisipa iha konferénsia ne’e mak reprezentante MAPKOMS, Prezidente CI no Membru, Prezidente RTTL.EP, Prezidente TATOLI no Mídia Nain sira, jornalista no ezekutivu CI.