Atividade

CI no BCTL Diskuti Prémiu ba Mídia

Díli – Conselho de Imprensa de Timor-Leste (CI) no Banco Central Timor-Leste (BCTL) hala’o diskusaun hamutuk iha sala enkontru BCTL, Segunda-Feira (24/08/2020), hodi ko’alia kona-ba prémiu ba mídia ne’ebé sei oferese husi BCTL.

Diskusaun ne’e liuhusi enkontru ofisiál ida entre Prezidente Conselho de Imprensa de Timor-Leste (CI), Virgílio da Silva Guterres no Diretór Ezekutivu-CI, Rigoberto Monteiro, hala’o enkontru ho Vise Governadór Banco Central Timor-Leste (BCTL), Venancio Alves Maria no Diretora Departamentu Ralasaun Internasional no Unidade Asuntus Korporativus-BCTL, Raquel da Costa Gonçalves.

Iha enkontru ne’e, BCTL husu ideias balun husi Conselho de Imprensa kona-ba planu BCTL nian atu atribui prémiu ba mídia sira ne’ebé manan tanba fó espasu barak hodi publika informasaun sira ho kualidade kona-ba finansas estadu.

Prezidente Conselho de Imprensa, husu ba Banco Central atu tau prioridade ba kritéria sira hanesan padraun kode étika jornalístika, promove boa governasaun nomós kombate korupsaun.

Conselho de Imprensa mós sei fasilita dadus balun ba Banco Central Timor-Leste hodi bele ajuda BCTL bainhira hala’o selesaun ba mídia sira ne’ebé merese duni atu hetan prémiu husi BCTL.

Aproveita oportunidade, Diretór Ezekutivu CI, Rigoberto Monteiro mós husu ba BCTL atu bele serbisu hamutuk ho CI hodi tau mós prémiu id aba jornalista sira ne’ebé halo kobertura di’ak liu kona-ba asuntu finansas. Diretór Ezekutivu esplika kada tinan Conselho de Imprensa sempre atribui prémiu ba jornalista sira tanba ne’e iha posibilidade BCTL mós bele atribui prémiu ida ba jornalista sira kona-ba asuntu finansas estadu.