Atividade

CI No AJTL Realiza Konferénsia Hili Reprezentante Jornalista Husi AJTL Ba CI

Dili, Conselho de Imprensa de Timor-Leste (CI) no Asosiasaun Jornalista Timor-Lorosa’e (AJTL) realiza konferénsia hili reprezentante jornalista husi AJTL ba tuur iha Conselho de Imprensa nu’udar Membru ba segundu mandatu 2020 – 2024, iha salaun konferénsia Delta Nova, 4/7/2020. 

“Ita presiza figura ne’ebé maka bele aproxima órgaun sira hanesan seguransa no defeza, atu respeita servisu jornalista nian bainhira sira halo servisu iha fatin públiku, tanba realidade hatudu katak, iha tinan hirak liu ba, iha jornalista balu maka sai vítima tanba hetan baku membru Polísia balu wainhira sira halo kobertura, ita presiza figura ne’ebé halo komunikasaun di’ak ho públiku nomos polítiku nain sira kona-ba servisu jornalizmu nian liu husi mídia literacy ne’ebé maka organiza husi Conselho de Imprensa, ha’u fiar katak ita sira ne’e iha hanoin ida de’it, hakarak defende liberdade imprensa no liberdade espresaun, ho nune’e ita hamutuk iha ne’e, hili ita nia reprezentante ne’ebé bele reprezenta ita hotu,” esperansa Prezidente AJTL, Maria Zevonia Fernandes Vieira, iha nia diskursu hahú konferénsia hili reprezentante jornalista husi AJTL ba CI.

Konselleiru Hugo Maria Fernandes nu’udar Membru Conselho de Imprensa ne’ebé SAI reprezentante jornalista husi AJTL ba tuur iha CI ba períodu dahuluk 2016-2020, relata atividade ne’ebé halo nu’udar Membru CI iha tinan haat nia laran. 

“Saida de’it mak sai produtu Conselho de Imprensa nian durante tinan haat, reprezentante jornalista nian, reprezentante mídia nain nian, nomeasaun polítika husi Parlamentu Nasionál, sira hamutuk mak halo, e halo buat barak, tinan haat ha’u hanoin halo buat barak, ha’u lakohi sura ida pur ida maibé iha pontu balu signifikante iha tinan haat nia laran, ida ita bele hasees jornalista sira tama kadeia, Prezidente Conselho de Imprensa lori naran Conselho de Imprensa nian fó sasin iha Tribunal, responsabilidade ne’ebé maka lei haruka.”

“Maski iha atinjementu barak, klaru iha mós buat barak mak seidauk konsege halo,” dehan Konselleiru Hugo.

“Conselho Imprensa ninia papel, ninia responsabilidade importante tebes iha públiku, ida maka garante independénsia editorial, ida seluk maka atu garante públiku nia direitu ba asesu informasaun,” informa Prezidente Conselho de Imprensa de Timor-Leste (CI), Virgílio da Silva Guterres, wainhira loke konferénsia AJTL.

Husi kandidatu nain tolu, feto 2, mane 1, iha kandidatu ida maka retira husi kandidatura maka kandidatu Bela Kortereal, nune’e kandidatu nain rua maka kompete iha konferénsia hili reprezentante jornalista husi AJTL ba tuur iha Conselho de Imprensa nu’udar Membru ba segundu mandatu 2020 – 2024, ikus mai rezulta kandidatu Virgilio Lamukan Guterres hetan votu 221 no kandidatu Rita Almeida ho votu 21.

Iha fatin hanesan, relasiona ho Esbosu projetu Lei Kriminalizasaun Defamasaun, iha sesaun enenseramentu, Laureadu Nobel da Pas, Jose Ramos Horta, fó hanoin ba ukun nain sira atu tau atensaun ba buat sira ne’ebé sai prioridade ba dezenvolvimentu nasaun.

“Nasaun ne’e, se jornalista ida inkompetente, estrada la monu, ponte la monu, Ministru ruma inkompetente entrada bele monu, ponte monu ou buat seluk,” Horta fó nia opiniaun.

Laureadu Nobel da Pas, konggratula mós Membru AJTL eleitu.

Konferénsia ne’e ensera ofisiálmente husi Ministru asuntu Parlamentáres no Komunikasaun Sosiál, Francisco M. da C. Perreira Jeronimo. “Ha’u hahú ho fó parabens ba reprezentante eleitu husi AJTL Sr.Virgílio ne’ebé maka sei ba hamutuk ho nia maluk sira tuur iha Conselho de Imprensa nomós parabens ba AJTL tanba Ita-Boot sira bele organiza di’ak tebetebes, demokrátiku tebetebes, bainhira hili imi nia reprezentante ba Conselho de Imprensa. “

Iha konferénsia ne’e, hetan partisipasaun maximu Laureadu Nobel da Pas, Jose Ramos Horta, Ministru asuntu Parlamentáres no Komunikasaun Sosiál, Prezidente Conselho de Imprensa ho Membru, membru Asosiasaun Jornalista Timor Lorosa’e (AJTL) nomós fundadór AJTL sira inklui mós ekipa tékniku Conselho de Imprensa, hamutuk liu ema na’in 350.