Previous Next

CI No CNC Realiza Soru-mutu Ho Parseiru Husi Órgaun No Meius Komunikasaun Sira

Dili, Conselho de Imprensa de Timor Leste (CI) koopera hamutuk ho Sentru Nasionál Chega (CNC), ne’ebé hametin liu hosi asina nota Kooperasaun iha loron 27 fulan Dezembru tinan 2019. Nune’e instituisaun rua ne’e, iha tinan 2020 ne’e,  realiza soru-mutu ho tema “Hasa’e Koñesimentu Jornalista Sira Kona-ba Relatóriu Chega! No CVA, Hodi Promove Paz no Proteje Direitus Umanus”, realiza iha salaun konferénsia CNC, iha 10/7/2020, hodi diskute ho parseiru sira hanesan jornalista senior, Xefe Editor hosi mídia públiku no privadu jornál, online TV, rádiu no jornalista rádiu komunidade, inklui asosiasaun jornalista TLPU no AJTL kona-ba induzaun programa CNC nomós servisu hamutuk entre CI no CNC hodi atribui prémiu jornalizmu ba pás nomos direitus umanus.

Sentru Nasionál Chega liu hosi Diretór Ezekutivu, Hugo Maria Fernandes, ko’alia kona-ba papél Sentru Nasionál Chega, relatóriu Chega no kontribuisaun média ka jornalista ba implementasaun rekomendasaun Chega! no per memória ad spem.

“Introdusaun ba kolega sira saida mak CAVR, saida maka CVA, saida maka agora CNC halo, e iha rekomendasaun ida husi CAVR ne’e maka hare ba knar jornalizmu nian ba ita nia luta ba ukun rasik an ne’e. Signifikante tebes maka rekomendasaun iha relatóriu hatete katak Governu tenke fó apoiu ba jornalista sira, meius komunikasaun sira para kontinua dezempeña sira nia knar hanesan periodu rezisténsia.”

Enkuantu hosi parte CI, Diretór Ezekutivu CI, Rigoberto Monteiro, hato’o kona-ba prémiu direitus umanu no jornalista ba pás. 

“Ita nia papél importante liu iha haburas demokrasia iha Timor-Leste, liuliu ita nia meiu komunikasaun ne’ebé maka prezensa iha komunidade nia let, radio komunidade sira. Mais importante liu knar komunikasaun ida ka mídia ida maka defende pas no estabilidade.”


Imprimir   Email