Díli – Lei nú 5/2014 kona-ba Lei Komunikasaun Sosiál (KomSso), iha artigu 49 hatete Conselho de Imprensa hato’o ba Parlamentu Nasionál relatóriu annual kona-ba atividade hotu hodi hetan apresiasaun no diskusaun liuhosi sorumutuk plenária.
Bazeia ba lei KomSos, Conselho de Imprensa de Timor-Leste (CI), tersa-feira, 23/6/2020, aprezenta relatóriu mandatu dahuluk períodu 2016-2020 ba Parlamentu Nasionál (PN) liuhosi sesaun plenária iha uma fukun PN.
Desde estabelese Conselho de Imprensa iha loron 10 Maiu 2016, foin ba dala uluk, CI hetan oportunidade husi Parlamentu Nasionál hodi ba aprezenta relatóriu CI nian ba membru Parlamentu sira iha Uma Fukun PN.
Iha relatóriu, aprezenta informasaun komprensivu no prevee kona-ba progresu serbisu Conselho de Imprensa (CI) nian durante mandatu dahuluk hahú husi Maiu 2016 to’o Maiu 2020.
Hahú husi nia estabelesimentu, prosesu elabora programa, hatuur nia prioridade sira, define nia polítika sira, estabelese nia jestaun, haforsa nia instituisaun no hametin nia relasaun ho entidade seluk, orienta nia serbisu to’o ikus halibur rezultadu implementasaun ba atividade hotu hodi produz relatóriu breve ida ba períodu dahuluk mandatu membru Conselho de Imprensa.
Komponente haat (4) ne’ebé aprezenta iha relatóriu referee, refleta Kompeténsia no akumula prioridade hotu ne’ebé mak ho fiar katak sei kontribui no lori CI sai hanesan órgaun e entidade reguladora ida ne’ebé independente, tuir prinsipiu sira ne’ebé hatuur tiha ona iha artigu 44, Lei Komunikasaun Sosiál. Nomós Estatutu Conselho de Imprensa rasik atu sai órgaun ida ne’ebé ho papél atu regula, kontrolu no superviziona operadór órgaun komunikasaun sosiál sira no monitoring ba atividade jornálístika hotu ho objetivu ida atu asegura liberdade imprensa, liberdade espresaun no atu asegura direitu públiku nian asesu ba informasaun.
Iha aprezentasaun, Prezidente Conselho de Imprensa, Virgílio da Silva Guterres hetete hafoin tinan haat (4) hahú husi 10 Maiu 2016 to’o 23 Juñu 2020, Conselho de Imprensa hetan oportunidade hodi hato’o relatóriu badak ba Parlamentu molok termina sira nia mandatu.
Prezidente mós aproveita okaziaun, hato’o agradese wa’in ba konfiansa tomak husi Deputadu sira iha Parlamentu Nasionál, Maluk Jornalista sira inklui Mídia Na’in hotu ne’ebé fó ona apoiu ba sira durante assume responsabilidade iha CI ba mandatu dahuluk.
“Conselho de Imprensa hetan mandatu tuir lei atu promove no defende liberdade de imprensa no liberdade de espresaun,” prezidente dehan Komponente ne’ebé CI defende maka’as iha liberdade imprensa mak independénsia editorial.
Bazeia ba mandatu CI nian tuir Lei KomSos maka durante mandatu dahuluk, CI liuhosi diresaun Dezenvolvimentu Analiza Mídia kontinua halo monitorizasaun loro loron ba produtu jornalístiku sira.
Nia dehan, iha aspetu independénsia editorial, Conselho de Imprensa nota katak durante tinan haat (4), sei iha intervensaun husi podér polítiku no podér ekonómiku sira husi ofisiál estadu nomós Governu ninian.
Durante intervensaun iha PN, Deputadu sira kestiona maka’as kona-ba reportajen mídia sira nian laiha sensivel ba jéneru, kestiona mós kona-ba kompozisaun membru Conselho nian ne’ebé laiha reprezentante feto.
Iha biban referee, Conselho de Imprensa mós halo diskusaun uitoan kona-ba Lei Kriminaliza Defamasaun. Tuir deputadu balun hatete lei ne’e importante tebes tanba atu proteje ema nia privasidade no naran di’ak. Mezmu nune’e, iha deputadu balun la konkorda ho lei kriminaliza defamasaun tanba limita ona ema nia liberdade espresaun nomós afeta ba atividade jornlístika.
Aprezenta relatóriu, lidera husi Prezidente Conselho de Imprensa de Timor-Leste, membru na’in haat, Fiskál Úniku nomós estrutura ezekutivu. Sesaun plenária lidera husi Vice II Prezidente Parlamentu Nasionál, Deputadu Luis Roberto, partisipa husi Deputadu sira iha Uma Fukun Parlamentu Nasionál. (CI)