Atividade

Prezidente CI : Demokrasia Iha, Bainhira Iha Imprensa Ne’ebé Livre

Dili, Prezidente Conselho de Imprensa de Timor-Leste (CI), Virgílio da Silva Guterres, ofisiálmente loke Konferénsia Timor Leste Press Union TLPU ba hili reprezentante jornalista hosi TLPU ba tuur iha conselho de imprensa nu’udar membru, períodu 2020 – 2024, iha salaun Delta Nova, Sábadu, 27/6/2020. 

“Primeiru atu hatete katak ita nia organizasaun, asosiasaun ka sindikatu sira, TLPU, ita halibur profesionais jornalista sira, ho respeitu hodi Conselho de Imprensa nia naran hakarak hato’o agradesementu ba TLPU, Prezidente ho nia estrutura tomak, mídia nain, jornalista veterandus sira ne’ebé iha ne’e no Jornalista foun sira,” dehan Prezidente CI wainhira hahú nia diskursu.

Iha Prezidente CI nia diskursu, foka liu ba importansia husi eventu realizasaun atividade TLPU ba hili reprezentante jornalista hosi TLPU ba tuur iha conselho de imprensa nu’udar membru, períodu 2020 – 2024 hare husi pontu de vista Conselho de imprensa nian katak, “ita nia servisu, loro loron ita ko’alia kona-ba demokrasia, ema dehan demokrasia ne’e iha bainhira iha imprensa ne’ebé livre, maibé dala barak jornalista sira mós mai ho oportunidade atu halo  debate demokrátiku, entaun enkontru sira hanesan ne’e, kongresu sira hanesan ne’e, ne’e oportunidade ba ita jornalista sira atu halo pratika demokrasia, debate, diskute malu, kona ba asuntu ne’ebé iha relasaun ho ita nia interese. Tuir fali, iha sala redasaun, iha ne’ebá Xefe redasaun sira, editor sira no jornalista sira tenke diskute asuntu saida mak sei sai headline news, asuntu saida mak sai opiniaun ou konteúdu editorial saida mak tenke fó sai entaun oportunidade sira hanesan ne’e, ita ko’alia.”

Prezidente CI mós klarifika asuntu importante ba TLPU kona-ba prosesu nomeia reprezentante ba iha Conselho Imprensa no rekoñese katak tanba hasoru dezafiu hanesan COVID- 19 no Estadu Emerjensia, realizasaun ba atividade nomeiasaun la la’o antes mandatu remata maibé bele realiza hafoin Estadu Emerjensia remata. 

Prezidente TLPU, Manuel Tilman, husu atu mantein kultura diskusaun entre jornalista ho firmi ba interese jornalizmu nian.

Reprezentante TLPU ba períodu dahuluk mandatu CI nian, Membru CI, Konselleiru Francisco Belo S. da Costa mós hato’o relatóriu servisu iha Conselho de Imprensa ba partisipantes konferénsia sira. 

Husi kandidatura nain 4 ne’ebe aprejentan husi partisipantes konferénsia sira hanesan Jornalista, Orasio Afonso Fatima Babo, Jornalista, Candidu Alves, Jornalista, Noemio Falcão no Jornalista, Francisco Belo S. da Costa (Membru CI períodu dahuluk 2016 - 2020) ne’ebé kompete iha hili reprezentante jornalista hosi TLPU ba tuur iha conselho de imprensa nu’udar membru, períodu 2020 – 2024, Francisco Belo S. Da Costa maka re-eleitu hikas fali. 

Iha fatin hanesan, Conselho de Imprensa de Timor-Leste (CI) no Timor Leste Press Union TLPU, asina akordu servisu hamutuk iha area fó formasaun ba jornalista sira. 

Iha sesaun enseramentu Prezidente Conselho de Imprensa hato’o parabéns ba reprezentante TLPU ne’ebé eleitu no agradese ba TLPU ba prosesu tomak hili  reprezentante TLPU, “liu husi ne’e, aprende atu rona malu, aprende atu simu rezultadu saida de’it maka hetan iha prosesu demokrátiku ida ne’e, ne’e fó konfiansa ba ita, iha ita nia komunikasaun, pratika loro loron, ita bele sai ezemplu ba polítiku sira ne’ebé fó votus ba sira maibé dala ruma pratika sees husi ita nia espetativa.”