Atividade

Conselho de Imprensa Audiensia ho Prezidente Parlamentu Nasionál

Díli – Conselho de Imprensa de Timor-Leste (CI), realiza enkontru kortezia ho Prezidente Parlamentu Nasionál (PPN), Aniceto Guterres, segunda-feira, 15/06/2020, iha gabinete PPN.

 Iha enkontru referee, Prezidente Conselho de Imprensa de Timor-Leste, Virgílio da Silva Guterres, relata serbisu CI nian durante tinan hat (4) tuir mandatu konstitusional ne’ebé estabelese iha tinan 2016 to’o 2020.

Iha biban ne’e, Conselho de Imprensa mós hato’o ba Prezidente Parlamentu Nasionál, Aniceto Guterres, kona-ba mandatu membru CI nian ne’ebé kompleta ona tinan hat (4). Conselho de Imprensa mós fó hanoin ba parlamentu atu bele nomeia ona reprezentante na’in rua (2) tuir lei Komunikasaun Sosiál hodi bele mai reprezenta PN nian iha Conselho de Imprensa durante tinan hat (4) ba períodu daruak.

“Ami hasoru prezidente parlamentu atu hato’o asuntu balun, primeiru, mandatu Conselho de Imprensa ba períodu tinan hat ninian remata ona, ne’ebé atu fó hatene ba prezidente parlamentu atu hahú prosesu iha parlamentu hodi nomeia membru foun sira ne’ebé atu ba troka”.

Virgílio dehan “ami mós propoin ba prezidente parlamentu atu molok ami na’in lima ne’e nia mandatu hotu, ami hakarak mós aprezenta ba plenária parlamentu ninian rezultadu serbisu ne’ebé ami na’in lima halo durante tinan hat nia laran”.

Conselho de Imprensa hato’o mós nia pozisaun kona-ba polítika Governu nian ne’ebé atu altera Lei Kódigu Penal hodi bele kriminaliza defamasaun no injuria. Tuir Prezidente Virgílio katak, lei ne’e sai hanesan retrosesu boot ita ba Timor-Leste, lei ne’e mós fó impaktu maka’as tebes ba Liberdade imprensa no liberdade espresaun iha Timor-Leste.

“Ami mai hato’o ba Prezidente Parlamentu, pozisaun Conselho de Imprensa nian relasiona ho inisiativa atu kriminaliza defamasaun ne’ebé mai husi ministériu justísa. Ami fó hanoin katak kriminalizasaun defamasaun ne’e sei halo Timor lakon nia fama iha mundu internasionál hanesan nasaun ne’ebé demokrátiku liu iha Rejiaun ida ne’e”, esplika Prezidente Conselho de Imprensa.

Iha enkontru, Prezidente Parlamentu Nasionál, Aniceto Guterres hato’o ba estrutura tomak Conselho de Imprensa nian katak PN sei nomeia nia reprezentante na’in rua iha loron 23/6 hodi bele ba tur iha CI nu’udar reprezenta PN. Iha biban ne’e mós Prezidente Parlamentu tau kedan iha ajeda Parlamentu nian katak iha loron 22/6, Conselho de Imprensa sei hato’o relatáriu ba Deputadus sira iha uma fukun liuhosi sessaun plenária.

Partisipa iha enkontru ne’e maka, Prezidente Parlamentu Nasionál, Aniceto Guterres, Prezidente Conselho de Imprensa, Virgílio da Silva Guterres, Konselleiru José Maria Ximenes, Konselleiru Hugo Maria Fernandes, Konselleiru Paulo A. C. Araujo, Konselleiru Francisco Belo Simões da Costa, Diretór Ezekutivu, Rigoberto Monteiro, Fiskál Úniku, João Paulo. (CI)