Liu husi konferénsia imprensa, ne’ebé realiza iha salaun enkontru CI, Quintal-Boot, Tersa-feira, 19/5/2020, Prezidente Conselho de Imprensa de Timor-Leste (CI), Virgílio da Silva Guterres, husu ba Jornalista sira atu labele sai fonte ba lia falsu, “iha situasaun ida ne’e, hakarak kontinua Conselho de Imprensa alerta no apela ba órgaun komunikasaun sosiál sira e jornalista sira, atu labele sai ajente ka fonte de difujaun ba lia falsu ou informasaun sira ne’ebé la verifikadu ou informasaun sira ne’ebé sidadaun sira nia espresaun ne’ebé laiha problema ikus mai ita transmite fila sai problema.”
“Tanba jornalista ho órgaun komunikasaun sosiál ne’e la’ós aparellu intelijénsia estadu ninian atu ba hafuhu sidadaun ida-idak ninia espresaun ikus mai tau ba iha públiku atu depois Polísia ba kaer sidadaun,” dehan Prezidente CI.
Prezidente CI, apela nafatin ba meius komunikasaun atu hato’o informasaun sira ne’ebé iha relevansia ho interese públiku ninian Prezidente CI, hatutan katak, “Conselho de Imprensa produz tiha ona, sosializa tiha ona no fahe tiha ona manual utilizasaun mídia sosiál ba jornalista sira, tanba ne’e husu ba jornalista sira hotu buka atu espresa sira nia hanoin, sira nia hahalok ne’e tuir etika profisionál, tuir kódigu deontolojiku ne’ebé regula sira hanesan profisionál.”
“Conselho de Imprensa hatete katak Jornalista ne’e bainhira hetan karteira profisionál nia Jornalista loron kalan, 24 oras, la’ós iha radio televizaun iha notísia ha’u jornalista, iha facebook ha’u la’ós jornalista, iha facebook ha’u polítiku fali, entaun espresaun sira ne’ebé jornalista halo iha ne’ebé de’it, atu iha festa ka iha konta mídia sosiál labele hamonu ninia integridade profisionál hanesan jornalista, ida ne’e maka Conselho de Imprensa hakarak apela ba kolega Jornalista sira,” informa Prezidente CI.