Atividade

CI Preokupa Intervensaun Aparellu Estadu Ba Sidadaun Nia Espresaun

CI Preokupa Intervensaun Aparellu Estadu Ba Sidadaun Nia Espresaun

“Conselho de Imprensa hakarak hato’o nia preokupasaun bazeia ba nia mandatu ne’ebé iha, atu garantia liberdade imprensa no liberdade espresaun, e tanba nia mandatu ida ne’e maka fó Kompeténsia ba Conselho de Imprensa atu hato’o nia preokupasaun kona-ba asuntu balun ne’ebé mosu tiha ona, e liuliu iha kontestu liberdade de espresaun,” Prezidente Conselho de Imprensa de Timor-Leste (CI), Virgílio da Silva Guterres, hato’o lia hirak ne’e liu husi konferénsia imprensa, ne’ebé realiza iha salaun enkontru CI, Quintal-Boot, Tersa-feira, 19/5/2020.

Prezidente Conselho de Imprensa de Timor-Leste (CI), Virgílio da Silva Guterres, hato’o CI nia preokupasaun katak, “Conselho de Imprensa akompaña ho preokupasaun tebes ba intervensaun sira ne’ebé maka aparellu estadu nia halo hasoru sidadaun sira kona-ba sira nia espresaun iha públiku liu husi sosiál mídia.”

Prezidente CI, esplika katak, “preokupasaun ne’e tanba báze konstitusional no báze legal ne’e maka haruka katak Timor-Leste ne’e estadu de direitu demokrátiku, estadu de direitu ne’e katak ita nia hanoin, ita nia hahalok, ita nia atuasaun tenke bazeia ba direitu, bazeia ba lei, e mós estadu demokrátiku katak demokrasia implika liberdade espresaun e liberdade de imprensa, katak iha sidadaun balu ne’ebé espresa, iha espresaun ne’ebé lei tenke regula, razaun atu regula espresaun sira ne’e so bazeia ba ameasa ba demokrasia katak ita atu salva guarda demokrasia ita tenke limita espresaun balun ne’ebé ikus mai hamosu distúrbiu públiku.”

“Tanba ne’e maka Conselho de Imprensa hakarak hato’o preokupasaun ida ne’e atu ba ita nia instituisaun estadu ninian atu halo intervensaun sira ba sidadaun sira se bele tenke tuir lei sira ne’ebé iha,” dehan Prezidente CI.