Díli – Conselho de Imprensa de Timor-Leste (CI), apresia bele serbisu hamutuk ho Asosiasaun Jornalista Timor-Lorosa’e (AJTL) no Ajénsia Programa Nasoens Unidas ba Dezenvolvimentu (PNUD).
Prezidente Conselho de Imprensa, Virgílio da Silva Guterres, hato’o apresiasaun ne’e iha nia intervensaun ba atividade Editor Club ho tema “Hametin Sala Redasaun ida Ne’ebé Livre no Independente husi Interferénsia Polítika no Ekonomia”, ne’ebé realiza iha salaun enkontru CI, Quintal Boot Dili, ne’ebé organiza hosi AJTL no hetan apoiu hosi UNDP no CI.
“Lori Conselho de Imprensa nia naran, hakarak hato’o apresiasaun ida maka’as tebes ba Asosiasaun Jornalista Timor Lorosa’e foti inisiativa atu halo diskusaun regular entre professional jornalizmu nian,” dehan Prezidente CI.
Nia akresenta katak UNDP ba Programa Eleisaun ninian, dezde hahú kedan husi 2016 CI eziste nomós 2017 iha eleisaun, iha momentu ne’eba kedan, UNDP ho CI halo kedan kooperasaun to’o ohin loron.
“Kooperasaun ne’e sei iha rezultadu di’ak hodi hasa’e kapasidade meius komunikasaun sosiál, jornalista sira, liliu atu hametin saida maka ohin ita atu diskuti,” esplika Prezidente CI.
Prezidente AJTL, Zevonia Vieira hatete nia parte agradese mós ba UNDP, liuhosi KOIKA iha Timor-Leste bele apoiu ona AJTL hodi realiza atividade Editor Club ho tema “Hametin Sala Redasaun ida Ne’ebé Livre no Independente husi Interferénsia Polítika no Ekonomia” hodi la’o tuir de’it kódigu Étika Jornalístika no prinsipiu sira jornalista ninian.
Zevonia dehan liuhosi diskusaun nakloke entre jornalista no editors sira, bele identifika asuntu importante sira ne’ebé iha hodi bele hametin liutan independensia editorial kada orgaun komunikasaun social sira.
Iha parte seluk, Jestór Electoral Project LEARN, Tito Filipe hatete sira iha serbisu ida di’ak tebes ho CI, AJTL nomós asosiasaun jornalista sira seluk hodi kontribui ba hametin serbisu jornalizmu nian iha Timor-Leste.
UNDP iha komitmentu boot atu apoiu nafatin asosiasaun jornalista sira, inklui Conselho de Imprensa nune’e iha futuru bele hametin liutan profesionalízmu jornalista sira nian. (CI)