Dili, Conselho de Imprensa de Timor-Leste (CI), realiza Press Conference, iha salaun Enkontru CI, Quintal-Boot, 30/4/2020, ho objetivu atu klarifika ba públiku kona-ba asuntu ne’ebé akontese iha fronteira Mota-Ain ne’ebé envolve Jornalista RTTL.EP ho Estudante nain 2 bazeia ba dadus foun ne’ebé CI hetan.
Prezidente Conselho de Imprensa de Timor-Leste (CI), Virgilio da Silva Guterres, hato’o katak, “Conselho de Imprensa de Timor-Leste (CI) halo konferénsia de imprensa ida ne’e, ho objetivu atu klatifika ba públiku kona-ba asuntu importante ida, ne’ebé ha’u hanoin sai viral mós iha mídia sosiál, asuntu ne’e relasiona ho akontesimentu ne’ebé akontese iha fronteira Batugadé ne’ebé involve kolega Jornalista husi RTTL,EP ho alin estudante nain rua.”
“Tanba iha diskusaun iha públiku, Conselho de Imprensa mós sai referénsia ba maluk balun e Conselho de Imprensa mós hato’o nia pozisaun iha momentu ne’ebá entaun aproveita oportunidade ida ne’e, Conselho Imprensa mós hato’o klarifikasaun balun tan bazeia ba informasaun ou dadus foun ne’ebé Conselho de Imprensa hetan,” dehan Prezidente CI.
CI hato’o apresiasaun maka’as ba TLPU ne’ebé iha inisiativa foti dadus iha fatin akontesimentu iha fronteira, tanba Jornalista RTTL.EP ne’e nu’udar Membru TLPU. “Conselho de Imprensa hakarak hato’o apresiasaun maka’as ba TLPU ne’ebé foti
inisiativa ba foti dadus ou informasaun balun iha fatin akontesimentu iha fronteira tanba Jornalista RTTL,EP hanesan Membru TLPU ninian e atu informa ohin TLPU hato’o ona sira nia rezultadu levantamentu de dadus ba iha Conselho de Imprensa.”
Prezidente CI esplika mos katak, “Conselho de Imprensa mós akompaña alin feto nain rua ne’e ida mós halo sira nia testemuña liu husi gravasaun audio ne’ebé sai ona iha mídia sosiál. Conselho de Imprensa halo komunikasaun mós ho maluk balun iha RTTL atu fó oportunidade ba alin feto nain rua ne’e atu hato’o mós sira nia opiniaun kona-ba akontesimentu ne’e. Akompaña mós katak Jornalista RTTL,EP hato’o ona keixa ba Polísia ho fiar katak depois de keixa ne’e Polísia mós bele halo prosesu investigasaun. Iha informasaun ne’ebé mós tama mai Conselho de Imprensa katak família husi alin feto nain rua nia mós iha tentativa atu buka solusaun ba akontesimentu ne’e atu pelumenus too iha hetan solusaun ruma ba iha dezentendimentu ne’ebé iha.”
Prezidente CI informa, Conselho de Imprensa mós akompaña prosesu sira seluk ne’ebé iha e Conselho de Imprensa prontu hato’o nia disponibilidade atu se parte rua hola desizaun atu rezolve ka hetan solusaun liu husi mediasaun. Conselho de Imprensa prontu atu fasilita, Conselho de Imprensa hakarak hato’o katak inisiativa ba mediasaun ne’e tenke mai husi parte rua ne’ebé involve iha akontesimentu. Conselho de Imprensa la’ós atu dehan taka dalan ba iha parte rua atu uza prosesu liu husi dalan seluk dalan legal ninian.
Conselho de Imprensa mós liu husi oportunidade ida ne’e apela ba públiku liuliu ba maluk jornalista sira atu mós hato’o opiniaun ruma kona-ba asuntu ne’e, di’ak liu evita atu halo julgamentu ba ema maibé hato’o liu husi reportajen ida ne’ebé balansu, reportajen ne’ebé la halo diskriminasaun ou la loke dalan ba ema atu akuza ema sira ne’ebé envolve iha kazu ne’e.
“Ita hotu hatene katak alin feto nain rua ne’e mós hetan akuzasaun iha mídia sosiál nune’e mós Jornalista RTTL,RP, Conselho de Imprensa hakarak hato’o ba públiku katak halo intervensaun ruma evita atu halo akuzasaun bainhira seidauk iha dadus
“Ida ne’e maka Conselho de Imprensa hakarak hato’o, dala ida tan Conselho de Imprensa hakarak reintera Conselho de Imprensa nia prontidaun se parte rua konkorda atu halo midiasaun,” informa Prezidente CI.