CI Simu Karta Protestu Kontra Impedimentu Papél Jornalista Husi AJTL no TLPU

Atividade Hare nain: 1684

Dili, Asosiasaun Jornalista Timor Lorosa'e (AJTL) no Timor-Leste Press Union (TLPU) nu'udar organizasaun mahon ba jornalista transmite ninia lamentasaun relasiona ho asesu jornalista sira ba eventu sira iha Pallasu Prezidente Repúblika. 

Karta protesta ne’e entrega direita hosi Prezidente AJTL, Zevonia Vieira no Prezidente TLPU, Manuel Pinto, ba Conselho de Imprensa de Timor-Leste (CI), iha edifísiu CI, 2/4/2020, Quintal-Boot.

Tuir AJTL no TLPU katak, insidente foun-liu ne’ebé akontese iha Pallasu Rezidénsia mak impedimentu envolve pesoál balu hasoru jornalista sira ne’ebé halo kobertura ba Prezidente Repúblika, Francisco Guterres "Lu-Olo" nia diskursu ba nasaun sobre Estadu Emerjensia iha Sesta (21/3), relasiona ho propagasaun peste COVID-19. 

Aktu seluk ne’ebé pesoál sira iha Pallasu Prezidente Repúblika komete mak impedimentu hasoru jornalista bainhira halo kobertura ba enkontru lider istóriku nian ne’ebé lidera husi Prezidente Repúblika iha 10 Fevereiru 2020 kona-ba solusaun ba impasse polítika iha rai-laran. 

Iha fatin hanesan, Prezidente CI, Virgílio da Silva Guterres, hato’o katak CI simu ona Karta Protesta kontra impedimentu jornalista ba asesu informasaun iha Pallasu Prezidente Repúblika husi AJTL no TLPU.
Tuir Prezidente CI, Conselho de Imprensa mós akompaña situasaun ne’e no Conselho de Imprensa sei hare karta protesta ne’e, nune’e bele fó hanoin ba malu ho instituisaun sira ne’e.