Atividade

CI, AJTL no RENETIL Realiza Editor Club

Dili – Asosiasaun Jornalista Timor-Lorosa’e (AJTL) parseiru ho Conselho de Imprensa de Timor-Leste no RENETIL, realiza sorumutu hodi ko’alia kona-ba “Mídia no Diplomasia,” ho oradór maka Eis Diplomata Timor Oan, Kim Fonseca, iha salaun enkontru Conselho de Imprensa, Quintal-Boot, iha loron 14/3/2020.

Prezidente AJTL, Zevonia Vieira esplika kona-ba sorumutu ne’e katak, “Planu estratéjia ne’ebé maka halo ona, loke diskusaun ida hanaran editor club hamutuk ho jornalista no estudante universitáriu sira, mai hamutuk, halo diskusaun kona-ba aspetu importante atu hatene, husi meiu ida ne’e, hamutuk ho espertu sira ne’ebé mak mai husi area ne’ebé la hanesan.”

Prezidente Conselho de Imprensa de Timor-Leste (CI), Virgílio da Silva Guterres, agradese ho inisiativa AJTL nomós ba oradór Kim Fonseca ne’ebé mak hakarak partilla informasaun kona-ba diplomasia no nia ligasaun ho mídia ba jornalista sira no universitáriu komunikasaun sosiál sira, “hanesan responsavel ba instituisaun ne’ebé mós iha responsabilidade fó Kapasitasaun ba jornalista sira, agradese tebes ba inisiativa ida ne’e.”   

Iha Editor Club ne’e, oradór esplika kona-ba servisu diplomata, saida maka diplomasia, oinsá diplomasia nia ligasaun ho mídia, tanba saida embaixada balun tenke taka, oinsá mídia bele kobre atividade diplomata sira no seluk tan.  

Editor Club ne’e partisipa hosi Prezidente CI, Prezidente AJTL, Membru AJTL, jornalista sira ne'ebé mak durante ne'e hala’o kobertura iha area diplomasia nian, estudante universitáriu hosi departamentu relasaun externa no oradór eis embaixadór TL nian ba Reinu Unidu no nu’udar Sekretáriu Jerál RENETIL, Joaquim Fonseca "Russuo".