CI no UNDP Realiza Treinamentu Journalism Fact Checking

Atividade Hare nain: 3365

Dili, ”Journalism Fact Checking Training workshop,” realiza iha loron 4-5/3/2020, iha Hotel Ramelau, no iha loron dahuluk, treinamentu ne’e loke husi Deputy Country Director UN Residence, Lazima Ontha no Membru Conselho de Imprensa de Timor-Leste (CI), Konselleiru, Francisco Belo S. da Costa.

Iha loron rua treinamentu ne’e aprezenta matéria kona-ba “Fake news, the new threat to democracy and how to fight it,” husi Bob Howarth, Korrespondente Nasaun Timor-Leste, Papua Nova Guinea, Illa Salomon ba Reporters San Frontiers (Paris), iha mós matéria kona-ba “Technique of using fact-checking tool,” hosi Jornalista Raimundo Oki no Tékniku Informátika IT, Armindo de Jesus, no matéria kona-ba “Social Media Guideline,” husi Alberico da Costa Junior, Diretór Dezenvolvimentu no Analiza Mídia CI. 

Wainhira Membru Conselho de Imprensa de Timor-Leste (CI), Konselleiru, Francisco Belo S. da Costa, ensera treinamentu ne’e hateten katak, “saida mak ita espera husi formasaun ida ne’e, bele sai hanesan estafeta oinsá luta hasoru fake news, hoax, preokupasaun fake news la’ós ba ita Timor de’it, ne’e preokupasaun global, tanba ne’e mak ita hanesan jornalista, ita sira hanesan editor mós, ita sira ne’e sai ai-tonka ida importante, ring ida importante tebes, atu bele satan informasaun falsu sira ne’ebé maka la’o iha ita nia sosiedade.”

Konselleiru Francisco, agradese tebes ba UNDP tanba UNDP bele kolabora di’ak tebes ho Conselho de Imprensa hodi realiza sesaun treinamentu ne’e. 

Iha oportunidade hanesan, Manager UNDP LEARN Project, Tito Filipe, informa katak, “ita hare iha fenómenu foun ida katak iha infiltrasaun notísia falsa atu kompete ho notísia sira produtu jornalizmu nian, agora atu ita fó ita nia resposta ba fenómenu ne’e maka saida, ita tenke iha kbiit atu bele filtru notísia ne’ebé los no notísia ne’ebé laloos, tanba ne’e maka atu fó resposta se, ita boot sira ne’ebé maka durante loron rua ho formasaun.” 

“Ami kontente atu apoiu formasaun ida ne’e tanba ne’e ami parseiru ho Conselho Imprensa atu bele hahú ona oinsá maka hatún lia-loos ne’e iha nia fatin no lia-falsu ne’e iha nia fatin,” dehan Manager UNDP LEARN Project, Tito Filipe.
Journalism Fact Checking Training workshop partisipa hosi Jornalista no editor hosi mídia online, printing , radio no televizaun ho total 63.