Prezidente CI: Prezensa Naunil Haburas Liutan Komunidade Mídia Iha Timor-Leste

Atividade Hare nain: 2758

Díli – Prezidente Conselho de Imprensa de Timor-Leste (CI), Virgílio da Silva Guterres hatete prezensa mídia online Naunil bele haburas liután komunidade mídia iha Timor-Leste.

Prezidente Virgílio da Silva Guterres hato’o kestaun ne’e iha serimónia lansamentu mídia online Naunil, iha salaun enkontru Ministériu Solidariedade Sosiál no Inkluzaun (MSSI), Sábadu (15/2/2020).

“Prezensa Naunil nian haburas liután komunidade mídia iha ita nia rain, liuliu iha esforsu tomak ne’ebé ita hotu halo atu haburas demokrasia,” esplika Prezidente CI, Virgílio Guterres iha nia intervensaun lansamentu Mídia Naunil.

Prezidente CI mós dezafia ekipa Naunil katak “atu eziste ne’e fásil, maibé atu reziste hodi mantein ita nia ezisténsia, ida ne’e maka dezafiu boot ba organizasaun hotu-hotu”.

Conselho de Imprensa hato’o parabéns ba ezisténsia mídia online Naunil no husu atu ekipa tomak Naunil nian atu hato’o mós informasaun sira hosi báze hodi labele konsentra de’it iha kapitál Dili.

Mídia Online Naunil forma hosi Iliomar oan na’in lima, nune’e naran hosi mídia ne’e foti hosi foho Naunil ne’ebé lokaliza iha postu Administrativu Iliomar, Munisípiu Lautem.

Diretór Mídia Online Naunil, Julito Ximenes hatete mídia online Naunil mosu atu serbí entidade hotu-hotu nune’e iha koñesimentu hodi bele partisipa iha dezenvolvimentu iha área potensiál sira.

Julito dehan ekipa mídia Naunil sei enfrenta hela dezafiu boot ida tanba sira hahú harii mídia referee hosi zero. Maski nune’e, Diretór Naunil fiar katak sira sei susesu tanba sira iha ona matadalan ka polítika ida difinitivu tebes.

Partisipa iha lansamentu referee, Maijor Jenerál, Lere Anan Timur, Prezidente Conselho de Imprensa, Virgílio da Silva Guterres, reprezentante SECOMS, entidade tomak órgaun no meiu komunikasaun sosiál sira, inklui asosiasaun jornalista TLPU. (CI)