Atividade

Papél CI hodi Garante Liberdade Imprensa & Liberdade Espresaun

 Prezidente Conselho de Imprensa de Timor-Leste (CI), Virgílio da Silva Guterres hateten, Conselho de Imprensa bele ezerse nia funsaun iha dependésia ba Komponente hotu hanesan, asosiasaun jornalista, órgaun no meiu komunikasaun sosiál sira, inklui jornalista hotu, hodi bele promove liberdade imprensa no liberdade espresaun iha Timor-Leste.

“Papél Conselho de Imprensa ne’e iha, kuandu iha buat seluk, iha mídia, jornalista, asosiasaun jornalista, entaun CI mosu mai atu superviziona. Entaun papél Conselho de Imprensa depende barak liu ba komponente sira seluk ne’ebé halo CI ne’e metin,” Prezidente CI argumenta kestaun ne’e iha nia intervesaun, iha kogresu AJTL ho tema “Hamutuk Hametin no Defende Independénsia Editoriál”, ne’ebé realiza iha estúdiu Televizaun Edukasaun Timor, sesta-feira (7/2/2020).

Koalia iha kongresu AJTL ba dal IV, Eis prezidente AJTL ne’e mós husu ba AJTL no TLPU atu kontinua kapasita membrus organizasaun nune’e bele hasa’e sira nia Kompeténsia hodi produs notísia ida kualidade. Iha biban kongresu, fundadór AJTL sira mós entrega deklasaun AJTL nian ne’ebé halo iha loron 22 Dezembru 1999 iha ótel Turizmu, bainhira funda asosiasaun jornalista refere no asina hosi fundadór sira kuaze na’in 60, ba Prezidente AJTL, David Hugo.

Membru AJTL, Raimundo Sarmento Fraga, husu hanoin kona-ba papél Conselho de Imprensa nian atu tau matan ba sentru formasaun journalizmu sira ne’ebé eziste iha Timor-Leste, ne’ebé hola parte mós ba promove liberdade imprensa no liberdade espresaun. Iha sesaun diskusaun , membru AJTL, Caetano Alves sujere ba estadu liuhosi SECOMS atu kanaliza formasaun sira ne’ebé Governu realiza ba AJTL no TLPU maka realiza.

Iha oportunidade ne’e, Prezidente TLPU, Manuel Pinto konsidera Timor-Leste hahu mosu impunidade ba jornalista sira nomós intervensaun mídia na’in sira iha redasaun ho podér ekonómiku. Husu mós ba organizasaun no estrutura AJTL no TLPU atu sai atan ba jornalista sira hosi serve sira bainhira hasoru impunidade ruma, hodi defende sira nia direitu.

Iha sesaun resposta, Prezidente CI esplika, Conselho de Imprensa laiha mandatu atu tau matan ba sentru formasaun ba jornalizmu ninian. Maibé Prezidente CI dehan importante tebes atu ejiste sentru formasaun sira bele ajuda forma foin-sa’e sira iha área jornalízmu nian.

CI mós husu ba organizasaun mídia no asosiasaun jornalista sira hanesan AJTL no TLPU atu iha rasik sentru formasaun bele kapasita ema tuir idak-idak nia karater organizasaun nian liuhosi produtu jornalístiku. Prezidente CI husu ba jornalista sira, maske serbisu iha organizasaun mídia ketak-ketak, maibé tenke fó solidariedade ba malu nafatin, nune’e bele forte liután hodi bele hasoru impunidade sira ne’ebé oras ne’e dadaun maluk jornalista sira hasoru. (CI)