Previous Next

CI Partisipa Asembleia Jeral Rádiu Komunidade Aileu ba Daruak

Aileu, 31/1/2020_ Diretór DCSRIC, Altino da Cruz Freitas, reprezenta Conselho de Imprensa de Timor-Leste hodi partisipa iha Asembleia Jerál Rádiu Komunidade Rai-husar Aileu ba daruak ne’ebé hala’o iha salaun Administrasaun Munisípiu Aileu.

Iha nia diskursu, Diretór DCSRIC, Altino Freitas, hateten Conselho de Imprensa de Timor-Leste nia knaar ida mak oinsá asegura liberdade imprensa no liberdade espresaun iha Timor-Leste. “Tanba ne’e hosi knaar ida ne’e mak oinsá bele asegura serbisu jornalista sira sein iha intervensaun ruma ba jornalista sira nia serbisu,” nia mensiona.

Maibé iha parte seluk mós Conselho de Imprensa nia knaar ida mak atu akompaña jornalista sira nia serbisu ho di’ak hodi bele garante povu nia direitu atu bele hetan informasaun ne’ebé loos no loloos.
Tuir Diretór ne’e nia hatene durante ne’e rádiu komunidade halo serbisu di’ak tebetebes ho autoridade munisípiu sira nomós postu inklui Suku sira.

“tuir ha’u nia hanoin rádiu komunidade ne’e hanesan sentru peskiza ida tanba laloos seitór edukasaun ho saúde de’it maibé seitór hotu-hotu jornalista hakat to’o iha ne’ebá,” dehan Diretór ne’e.

Tanba ne’e lori Conselho de Imprensa nia naran hakarak agradese no hato’o parabéns ba rádiu komunidade sira tanba liu hosi informasaun sira ne’ebé hato’o,  ajuda tebetebes populasaun sira.

“Alein de hato’o informasaun hanesan mós fó edukasaun no la’ós ida ne’e de’it, Rádiu komunidade sira mós sai hanesan sentru ba jovens sira,” Diretór esplika.

Nune’e, nia parte husu ba hotu-hotu atu hamutuk bele kontribui tanba rádiu komunidade hanesan meius ida ne’ebé hato’o informasaun hosi baze mai munisípiu no hosi munisípiu bele to’o iha Nasionál.

Aproveita oportunidade ne’e, Diretór mós halo esplikasaun kona-ba serbisu Conselho de Imprensa nian ba partisipante iha asembleia ida ne’e kona-ba Conselho de Imprensa nia vizaun no misaun durante ne’e.

Aproveita oportunidade ida ne’e mós, Diretór esplika kada serbisu iha diresaun ida-idak nian no progresu sira ne’ebé durante ne’e Conselho de Imprensa halo ona inklui Sosializasaun Lei KOMSOS ne’ebé durante ne’e halo ba munisípiu sira.


Imprimir   Email