Díli – Conselho de Imprensa de Timor-Leste (CI), hato’o agradese wa’in ba komprimísiu eis Diretora Ezekutiva CI, Ana Teresa Sequeira ne’ebé serbisu hamutuk ona ho CI hahú hosi tinan 2016 to’o 2020.
Prezidente Conselho de Imprensa de Timor-Leste (CI), Virgílio da Silva Guterres hato’o agradesementu ne’e, iha nia diskursu ba serimónia tomada de posse Diretór Ezekutivu foun, kinta-feira (30/1), iha Conselho de Imprensa, Quintal Boot, Díli.
“Lori Conselho de Imprensa nia naran hakarak agradese ba Dotora Ana Teresa Sequeira, ba ninia kompromísiu nomós ninia didikasaun, liliu iha períodu ne’ebé defisil bainhira CI hahú iha 2016 to’o 2020,” esplika Prezidente CI.
Prezidente rekoñese katak, iha inísiu CI hahú, Diretora ezekutiva mesak hamutuk ho membru na’in lima (5) no Asesor Planu no Programasaun, ikus mai konstitui ekipa boot ne’ebé ohin loron CI iha.
Prezidente CI espera katak, eis Diretora Ezekutiva hanesan ema ida ne’ebé iha koñesementu klean kona-ba área jornalízmu nian, kontinua nafatin fó kontribuisaun ba seitór komunikasaun sosiál iha Timor-Leste.
Eis Diretora Ezekutiva, Ana Teresa Sequeira, hahú serbisu hamutuk ho Conselho de Imprensa iha tinan 2016 to’o 2020.
Liuhosi deliberasaun nú 3/2020, loron 15 Janeiru, Conselho de Imprensa nomeia hikas Rigoberto Monteiro hodi asumi kargu Diretór Ezekutivu ba mandatu ida (1) durantu tinan rua (2). Diretór Ezekutivu, Rigoberto Monteiro hetan tomada de posse iha kinta-feira (30/01), iha Conselho de Imprensa.
Partisipa iha serimónia tomada de posse, Prezidente Conselho de Imprensa no membru na’in haat (4), Komisáriu Komisaun Antí-Korupsaun, reprezentante Sekretáriu Estadu Komunikasaun Sosiál, Sekretáriu Ezekutivu Komisaun Funsaun Públiku, diretores hosi órgaun no meiu komunikasaun sosiál nomós parseiru sira Conselho de Imprensa nian.