Previous Next

Conselho de Imprensa fó Posse ba Diretór Ezekutivu Foun

Díli – Kinta-feira (30/1), Conselho de Imprensa de Timor-Leste (CI) fó tomada de posse ba Diretór Ezekutivu (DE) foun, Rigoberto Monteiro, iha salaun enkontru Conselho de Imprensa, Quintal-Boot.

Rigoberto Monteiro, hetan fiar hodi lidera órgaun autónoma ne’e, liuhosi Deliberasaun Conselho de Imprensa nú 3/2020, hodi troka eis Diretora Ezekutiva, Ana Teresa Sequeira, ba períodu tinan rua (2).

Prezidente Conselho de Imprensa hato’o parabens ba Diretór Ezekutivu, Rigoberto Monteiro ne’ebé hatudu prontidaun no disponibilidade hodi simu kargu refere.

Prezidente Conselho de Imprensa fiar katak ho koñesimentu no kapasidade ne’ebé iha, sei fó efeitu ne’ebé pozetivu ba funsionamentu ezekutivu CI nian. Alein de koñesimentu, Prezidente CI rekoñese katak Diretór Ezekutivu foun iha kapasidade komunikasaun ho ema hotu-hotu, liu-liu parte ezekutiu nian.

“Ami na’in lima hola desizaun atu nomeia Sr. Rigoberto Monteiro tanba esperiénsia, koñesimentu no kapasidade ne’ebé nia hatudu ba Conselho de Imprensa durante tinan haat (4) nu’udar asesór ba planu no programa nian,” esplika prezidente CI.

Prezidente CI hato’o mós ba parseiru sira katak, Conselho de Imprensa komprometidu atu kontinua hametin serbisu ho parseiru sira iha aspetu tolu (3) ne’ebé lei fó hodi dezenvolve kapasidade téknika, kapasidade professional no kapasidade intelektuál ba professional jornalista sira.

Diretór Ezekutivu, Rigoberto Monteiro hato’o agradese wa’in ba Prezidente Conselho de Imprensa no membru na’in haat (4) ne’ebé fó ona konfiansa ba nia atu asumi kargu ezekutivu nian.

Tuir Rigoberto, kargu ezekutivu ezije reponsabilidade, komitmentu no dedikasaun ida boot liutan, ezije kualidade professional, kapasidade téknika ne’ebé as.

“Ho esperiénsia ne’ebé ha’u iha, durante tinan haat (4) iha Conselho de Imprensa hanesan asesór ba planu no programasaun, ha’u sei la husik leet konfiansa ne’ebé ita boot na’in lima fó mai ha’u,” dehan Diretór Ezekutivu, Rigoberto Monteiro, iha nia diskursu iha serimónia tomada de pose, kinta-feira ne’e.

Partisipa iha serimónia tomada de posse, Prezidente Conselho de Imprensa no membru na’in haat (4), Komisáriu Komisaun Antí-Korupsaun, reprezentante Sekretáriu Estadu Komunikasaun Sosiál, Sekretáriu Ezekutivu Komisaun Funsaun Públiku, diretores hosi órgaun no meiu komunikasaun sosiál nomós parseiru sira Conselho de Imprensa nian.


Imprimir   Email