Díli – Sesta-feira, 20 Dezembru 2019, iha salaun Delta Nova, Conselho de Imprensa de Timor-Leste (CI) lansa ona ba públiku kona-ba formatu keixa online hodi fasilita di’ak liutan públiku atu asesu.
Diretora Ezekutiva, Ana Teresa Sequeira, iha nia intervensaun hatete lansamentu formatu keixa online hodi hametin liutan serbisu Conselho de Imprensa nian liuhosi dijitaliza atendimentu sira.
“Iha prosesu hametin instituisaun nian, Conselho de Imprensa tenta dijitaliza serbisu atendimentu sira. Loron ohin (20/12), lansa mós ba públiku meiu fasil ida ho baze internet hodi atende keixa hosi públiku kona-ba produtu jornalístiku sira ne’ebé halo infrasaun hasoru lei,” esplika Diretora Ezekutiva.
Diretora Ana Tereza Sequeira dehan meiu dijital sira ne’e bele hametin liuta serbisu CI nian no hein katak iha tinan sira tuir mai, Conselho de Imprensa bele hatudu produtividade serbisu ida di’ak liutan.
Formatu keixa online, hanesan maneira ida ne’ebé Conselho de Imprensa hala’o hodi serbi públiku tanba iha Timor-Leste, ohin loron ema barak maka asesu ona ba internet kona-ba produtu jornalístiku sira. (CI)